17 დეკემბერს მაღაზია „მფრინავი მღებავის“ სივრცეში, Nikakoi-ს ალბომის, სახელწოდებით Stochastic Device, პრეზენტაცია გაიმართა. Stochastic Device არარსებული ანიმეს საუნდტრეკია.
მუსიკოსმა პროექტი, სახელწოდებით „წიგნი არარსებული ანიმესათვის“ 2022 წლის მარტში დაიწყო. ის გმირების დიზაინს, ანიმაციის ფონებს, სცენების სკეტჩებს, გარემოს კონცეპტ ჩანახატებს, კადრირების მაგალითებს და სხვა კომპონენტებს აერთიანებს. თუმცა თვითონ ანიმე ფილმი არ იარსებებს. პროექტის იდეა იმასაც გულისხმობს, რომ არსებული მასალით, ანიმაციის საკუთარი ვერსია შექმნა ყველას შეეძლება. Stochastic Device სწორედ ამ არარსებული ანიმეს საუნდტრეკია. ალბომში შვიდი კომპოზიცია შედის, თითოეულ მათგანს არარსებული ანიმეს პერსონაჟების სახელები ჰქვია და მათ მუსიკალურ თემებს წარმოადგენს.
პრეზენტაციაზე მუსიკოსმა ალბომის შვიდივე კომპოზიცია შეასრულა. პარალელურად კი, აუდიტორია პროექტორით გაშვებულ ვიზუალს ხედავდა, რომლებიც ანიმეს პერსონაჟების გამოსახულებები იყო. პრეზენტაციის ბოლოს Nikakoi-მ კიდევ ერთი ახალი, ჯერჯერობით უსათაურო კომპოზიცია შეასრულა.
„ჩემთვის ძალიან მნიშვნელოვანია, რომ დღევანდელ პრეზენტაციაზე ხალხი მოვიდა, ეს ყველაფერი ნახა და მოისმინა. მიხარია, რომ ალბომის პრეზენტაცია ასეთი ფორმით შედგა. ეს კიდევ ერთი ნაბიჯია, რომ წიგნი საბოლოოდ გაკეთდეს. შემდეგ უკვე ყველანაირი მასალა იქნება იმისათვის, რომ თუ ვინმეს სურვილი გაუჩნდება, ანიმაცია გადაიღოს.” – თქვა Billboard Georgia-სთან საუბრისას Nikakoi-მ (ნიკა მაჩაიძე).
Stochastic Device დამოუკიდებელმა მუსიკალურმა ლეიბლმა, CES Records-მა გამოსცა
„ნიკას ახალი ალბომი წლებია არ გამოცემულა და ვფიქრობ, Stochastic Device მის შემოქმედებაში ერთ-ერთი გამორჩეული ნამუშევარია. ამ ალბომით მან ახალი სიღრმეები აღმოაჩინა. თავად პროექტი ძალიან ვრცელია, რადგან უამრავ კომპონენტს მოიცავს, როგორც შინაარსობრივად და კონცეპტუალურად, ასევე – მუსიკალურად.“ – ნათია სართანია, მუსიკოსი, CES Records-ის დამფუძნებელი.
პროექტის ფარგლებში, Nikakoi-მ მაღაზია „მფრინავ მღებავთან“ ერთად, არარსებული ანიმეს მერჩენდაიზი გამოუშვა. ეს არის მებრძოლის მაისურები გმირების პრინტით. მაისურებზე ასევე დატანილია მოკლე ფრაგმენტული ტექსტები.
მერჩენდაიზის დიზაინზე Nikakoi-სთან ერთად, „მფრინავი მღებავის“ დამფუძნებელმა, ეკატერინე ქეცბაიამ იმუშავა.
„ასეთი ტიპის კოლაბორაციები ყოველთვის მნიშვნელოვანია, რადგან ის უფრო ცოცხალს და ხელშესახებს ხდის პროექტის იდეას, მის კონცეფციას. ამ მაისურების ფლობა სიმბოლურ ხასიათს ატარებს – ტანისამოსთან ერთად, ჩვენ ისტორიის მატარებლებიც ვხდებით. მგონია, თითოეული ეს გმირი თავისებურ უნარებს გვაძლევს და გვაძლიერებს“ – ეკატერინე ქეცბაია, მფრინავი მღებავის“ დამფუძნებელი
ალბომის შესახებ სტატია წაიკითხეთ ბმულზე.
