Need a Chance – ნატალია ნაყოფია ახალ სიმღერასა და ვიდეოკლიპს აზიარებს. მუსიკისა და ტექსტის ავტორი თავადვეა. ვიდეოკლიპი კი Collaba-მ გადაიღო.
„ზოგადად არ მიყვარს ხოლმე, ჩემს სიმღერებზე ლაპარაკი. მინდა, რომ ადამიანებმა თავიანთი ინტერპრეტაცია გააკეთონ, რადგან ყველა სხვადასხვანაირად ხედავს და ყველა სხვადასხვანაირად უსმენს. მაგრამ ზოგადად ვიტყვი, რომ ალბათ ყველას გვიგრძნია თავი მარტოდ. ეს სიმღერა კი ამ სიმარტოვის გრძნობაზეა, რომელიც გვაქვს ხოლმე და მისგან თავის დაღწევის მეთოდებსა და გზებს ვეძებთ.
კლიპს რაც შეეხება, შევეცადეთ, რომ მარტივი და ლამაზი კონცეპტი შეგვექმნა. ამჯერად სიუჟეტური კლიპი არ გვინდოდა. ჩვენი მიზანი უბრალოდ ლამაზი სეტის აწყობა და კარგი გარემოსა და განწყობის შექმნა იყო.”
მომღერალი უახლოეს მომავალში კიდევ რამდენიმე სიმღერის გამოშვებას აპირებს, რის შემდეგაც მსმენელის წინაშე უკვე სადებიუტო კონცერტით წარდგება.
„ჯერ ამაზე არც მისაუბრია და პირველს თქვენ გეუბნებით. რამდენიმე თვეში ვაპირებ კონცერტის გამართვას. ჩემი რეპერტუარიდან შევასრულებ სიმღერებს და მეყოლება მოწვეული არტისტებიც. Მათ ვინაობას ჯერ არ დავასახელებ, მაგრამ სცენაზე ძალიან საინტერესო და ნიჭიერი არტისტები შემომიერთდებიან.”
