ცნობილმა ბრიტანულმა ნიუ ვეივ ჯგუფმა Duran Duran ჰოლივუდში, ხმის ჩამწერი სტუდიის Capitol Records შენობის სახურავზე კონცერტი გამართა, თავად ნაგებობა ამ დროს უკრაინის დროშის ფერებში იყო განათებული.
ღონისძიება 10-საათიანი ტელემარათონის ფარგლებში ჩატარდა, რომელიც მიზნად უკრაინაში ომის შედეგად დაზარალებული ადამიანების დასახმარებლად თანხის შეგროვებას ისახავდა.
Duran Duran ინგლისის ქალაქ ბირმინგემში 1978 წელს შეიქმნა. სამ წელიწადში მუსიკოსებმა ჯგუფისვე სახელწოდების მქონე სადებიუტო ალბომი გაავრცელეს. კოლექტივს ამ დრომდე 15 სტუდიური ნამუშევარი აქვს გამოცემული. ბენდმა მოღვაწეობის განმავლობაში 100 მილიონზე მეტი ჩანაწერი გაყიდა, რამაც ის მსოფლიოში ყველა დროის ერთ-ერთ ყველაზე გაყიდვად ჯგუფად აქცია. ორი გრემის მფლობელ Duran Duran-ს ჰოლივუდის დიდების ხეივანში ვარსკვლავიც გაუხსნეს.
