2022 წლის ოსკარების დაჯილდოების ცერემონია ცნობილმა ამერიკელმა მომღერალმა, ბიონსემ გახსნა და ბიოგრაფიული ფილმიდან King Richard სიმღერა Be Alive შეასრულა. კინოსურათი ჩოგბურთელების, ვენუს და სერენა უილიამსის მამისა და მწვრთნელის, რიჩარდ უილიამსის შესახებ მოგვითხრობს.
პერფორმანსი კალიფორნიის შტატის ქალაქ კომპტონში შედგა. ბიონსე, ბექვოკალისტები და მოცეკვავეები ჩოგბურთის ბურთის მსგავს ნეონისფერ სამოსში იყვნენ გამოწყობილი, ფონიც ამავე ფერში იყო გადაწყვეტილი. სიმღერაზე არტისტმა მუსიკოს Dixson-თან ერთად იმუშავა. ეს პირველი შემთხვევა იყო, როცა კომპოზიცია ცოცხლად შესრულდა.
სიმღერა დაჯილდოებაზე წლის საუკეთესო საუნდტრეკის კატეგორიაში იყო წარდგენილი, მაგრამ გამარჯვება ვერ მოიპოვა. როგორც ცნობილია, აქამდე ოსკარების შორთლისტში ბიონსეს ნამუშევარი Spirit მოხვდა ანიმაციური ფილმიდან The Lion King, თუმცა კინოაკადემიამ საბოლოოდ ის ნომინანტთა შორის არ შეიყვანა.
ბიონსე ნოულს-კარტერი თანამედროვეობის ერთ-ერთი ყველაზე წარმატებული მუსიკოსია. 28 გრემის მფლობელ შემსრულებელს კარიერის განმავლობაში 120 მილიონი ჩანაწერი აქვს გაყიდული. არაერთი ჰიტის ავტორს განსაკუთრებული პოპულარობა კომპოზიციებმა Single Ladies, Crazy In Love, Irreplaceable და Formation მოუტანა. ის პირველი სოლო არტისტია, რომლის პირველი ექვსი სტუდიური ალბომი Billboard 200-ის სათავეში მოხვდა.
