ცნობილმა ამერიკელმა მუსიკოსებმა, ბილი აილიშმა და ფინეასმა ოსკარების 94-ე დაჯილდოებაზე ჯეიმს ბონდის შესახებ გადაღებული ფილმისთვის დაწერილი სიმღერით No Time to Die საუკეთესო საუნდტრეკის ნომინაციაში გაიმარჯვეს. ისინი პირველი დედმამიშვილები არიან რობერტ და რიჩარდ შერმანების შემდეგ, რომლებმაც ამ კატეგორიაში კინოაკადემიის ჯილდო მიიღეს. ძმებმა ოსკარი 1964 წელს “მერი პოპინსისთვის” შექმნილი ნამუშევრით Chim Chim Cher-ee დაიმსახურეს.
No Time to Die ჯეიმს ბონდისთვის დაწერილი უკვე მესამე კომპოზიციაა, რომელსაც ოსკარი ერგო. პირველი ორი გამარჯვებული გახლდათ 2012 წლის ფილმიდან Skyfall ამავე სახელწოდების სიმღერა ბრიტანელი ადელის შესრულებით და სემ სმიტის Writing’s on the Wall 2015 წლის კინოსურათიდან Spectre.
20 წლის აილიში ამ ნომინაციაში გამარჯვებული რიგით მეორე ყველაზე ახალგაზრდა მუსიკოსია. 2008 წელს ჩეხ-ისლანდიელ მარკეტა ირგლოვას 20 წლის შესრულებამდე ოთხი დღე აშორებდა, როდესაც ოსკარი ფილმისთვის Once დაწერილი ჰიტისთვის Falling Slowly ერგო. თუმცა, ჯეიმს ბონდის შესახებ შექმნილი კინოსურათის გამოშვება კორონავირუსის პანდემიის გამო რომ არ გადაედოთ და გეგმისამებრ 2020 წელს გამოსულიყო, ბილი ოსკარს 2021 წლის თებერვალში, 19 წლისა და 2 თვის ასაკში მიიღებდა.
“დაუჯერებელია, შეიძლება, ვიყვირო”, – განაცხადა აილიშმა სამადლობელი სიტყვით გამოსვლისას. მან მადლობა გადაუხადა გერმანელ კომპოზიტორ ჰანს ციმერს, რომელმაც სიმღერის საორკესტრო არანჟირებაზე იმუშავა, აგრეთვე, გიტარისტ ჯონი მარს, რომელმაც “კომპოზიცია ჯეიმს ბონდისთვის შესაფერის საუნდტრეკად აქცია”. ფინეასმა კი მადლობა მშობლებს გადაუხადა – “გვიყვარხართ, როგორც მშობლები და როგორც ადამიანები”.
აღსანიშნავია, რომ No Time to Die-ს 2021 წლის მარტში გრემი ვიზუალური მედიისთვის დაწერილი საუკეთესო სიმღერისთვის ერგო. ამასთან, ოსკარებზე წლის საუნდტრეკის კატეგორიაში წარდგენილ სხვა ნამუშევრებთან შედარებით ტრეკმა ბილბორდის ცხელ ასეულში საუკეთესო შედეგი აჩვენა. ნომინაციაში გამარჯვებისთვის აგრეთვე იბრძოდნენ: ბიონსე ნოულსის Be Alive ფილმიდან King Richard, ლინ-მანუელ მირანდას Dos Oruguitas კინოსურათიდან Encanto, ვან მორისონის Down to Joy ფილმიდან Belfast და დიან უორენის Somehow You Do კინონამუშევრიდან Four Good Days.
