პოპულარულმა ამერიკულმა როკ ჯგუფმა Red Hot Chili Peppers რიგით მე-12 სტუდიური ალბომი Unlimited Love გამოუშვა, რომელიც 17 სიმღერას მოიცავს. ეს ბენდის მიერ 2006 წლის შემდეგ გამოცემული პირველი ნამუშევარია, რომელშიც გიტარისტი ჯონ ფრუშანტე მონაწილეობს, ხოლო 2011 წლის შემდგომ გამოქვეყნებული პირველი ჩანაწერია, რომლის პროდიუსინგიც რიკ რუბინს ეკუთვნის. ყველა მათგანს წარსულში ერთად ალბომებზე Blood Sugar Sex Magik, By The Way და Stadium Arcadium აქვთ ნამუშევარი.
სტუდიური ჩანაწერის გამოშვებამდე რამდენიმე საათით ადრე ჰოლივუდის დიდების ხეივანში ბენდს ვარსკვლავი გაუხსნეს. ცერემონიაზე სიტყვით გამოვიდნენ კოლექტივის მეგობრები, მუსიკოსი ბობ ფორესტი, ფანკ შემსრულებელი ჯორჯ კლინტონი და მსახიობი ვუდი ჰარელსონი.
Red Hot Chili Peppers 1983 წელს ლოს ანჯელესში შეიქმნა. 6 გრემის მფლობელ კოლექტივს დღემდე 100 მილიონზე მეტი ჩანაწერი აქვს გაყიდული. არტისტებმა ბილბორდის ალტერნატიული მუსიკის ჩარტის რეკორდიც მოხსნეს – სხვადასხვა დროს ჰიტ აღლუმს ბენდის 13 სინგლი ლიდერობდა. ბენდი 2012 წელს როკ-ენ-როლის დიდების დარბაზში შეიყვანეს.
