Anitta სამენოვან ალბომს Versions of Me ავრცელებს

ფოტო: Anitta

ბრაზილიელი მომღერალი ლარისა მაჩადო, ფსევდონიმით Anitta, ლეიბლ Warner Records-თან თანამშრომლობით ახალ სტუდიურ ალბომს Versions of Me აქვეყნებს. 15-ტრეკიანი სტუდიური ნამუშევარი მოიცავს რეპერ ქარდი ბისთან და მაიკ თაუერსთან ერთად ჩაწერილ სიმღერას Me Gusta, ალტერნატიულ პანკ ტრეკს Boys Don’t Cry, ასევე, კომპოზიციას Girl From Rio, რომელშიც გასემპლილია 1962 წლის ჰიტი Garota de Ipanema.

2019 წლის ალბომის Kisses მსგავსად, ანიტა ახალ სტუდიურ ჩანაწერშიც სამ ენაზე მღერის: ესპანურად, ინგლისურად და მშობლიურ პორტუგალიურად. 

“ჩემი დროის სამ ენაზე გაზიარება ბევრ მუშაობას მოითხოვს. მართალია, მე იმად ვრჩები, რაც ვარ, მაგრამ თხრობის სტილი ოდნავ იცვლება. ამიტომ ჩემი თავის ბევრი ვერსია მყავს”, – აღნიშნა მუსიკოსმა.

ქვემოთ გთავაზობთ ალბომში შესულ ხუთ კომპოზიციას Billboard-ის ლათინური მუსიკის კატეგორიის რედაქტორებისგან:

Envolver

ანიტას ახალი ალბომის გამხსნელი კომპოზიცია გამოსვლისთანავე Billboard Global-ის ჩარტის პირველ პოზიციაზე, ხოლო Hot Latin Songs-ის ტოპ ათეულში მოხვდა. ამასთან, ტრეკი პლატფორმა TikTok-ზე საცეკვაო ჩელენჯის წამოწყების საფუძველი გახდა.

Gata

რეგეტონ კომპოზიციაში მოწვეული არტისტის რანგში პუერტორიკოელი შემსრულებელი ჩენჩო კორლეონე მონაწილეობს. ტრეკში რეგეტონ დუეტის Plan B ნამუშევარი Guatauba არის გასემპლილი.

Versions of Me

ელექტროპოპ კომპოზიციას Boys Don’t Cry და აკუსტიკურ ბალადას Turn It Up შორის მოქცეული ალბომისვე სახელწოდების მქონე, სტუდიური ნამუშევრის ალბათ ყველაზე კომერციული სიმღერა კიდევ ერთხელ ადასტურებს ანიტას უნივერსალურობასა და სხვადასხვა ჟანრებში მუშაობის ქამელეონისებურ უნარს.

Ur Baby

რეგეტონ კომპოზიციაში მონაწილეობის მისაღებად ანიტამ ცნობილი ამერიკელი არტისტი Khalid მიიწვია. სიმღერა მოგვითხრობს ორი ადამიანის შესახებ, რომლებსაც ერთად ყოფნა სურთ, თუმცა, არ იციან, რას მოუტანს ეს მათ მომავალში. აღსანიშნავია, რომ ქალიდს წარსულში სხვა ლათინოამერიკელ მუსიკოსებთანაც უთანამშრომლია, მათ შორის კოლუმბიელ ჯეი ბალვინთან.

Faking Love

კომპოზიციაში მონაწილეობის მისაღებად ანიტამ ამერიკელი ჰიპ ჰოპ არტისტი Saweetie მოიწვია. ნამუშევრის ტექსტი აღწერს იმ ურთიერთობის დასრულებისგან მიღებულ კმაყოფილებას, რომელსაც ბედნიერება არ მოჰქონდა.

ანიტამ მუსიკალური მოღვაწეობა 2010 წელს დაიწყო. მშობლიურ ბრაზილიაში პოპულარობა მას 2013 წელს კომპოზიციამ Show das Poderosas მოუტანა. ქვეყნის გარეთ წარმატებას კი ისეთ ცნობილ შემსრულებლებთან თანამშრომლობით მიაღწია, როგორებიც არიან: მადონა, Black Eyed Peas, იგი აზალია, Major Lazer, რიტა ორა  და სხვები. მომღერალს დღემდე ხუთი სტუდიური ალბომი აქვს გამოშვებული.

Share
Tweet
Share
Share
Share

წინა სტატია

DJ Khaled-ს ჰოლივუდის დიდების ხეივანში ვარსკვლავი გაუხსნეს

შემდეგი სტატია

Gangnam Style-ის ავტორი Psy აპრილის ბოლოს ახალი ალბომით დაბრუნდება

შეიძლება დაგაინტერესოთ

SZA

SZA-ს ახალი სინგლი Saturn

სიმღერის დებიუტი Mastercard-ის რეკლამაში შედგა, რომელიც 2024 წლის გრემის დაჯილდოებაზე გავიდა. მუსიკოსმა დაჯილდოებაზე სამი ჯილდო მიიღო.
მეტი