ნიუ იორკელი ახალბედა დრილ რეპერი, კევინ პერეზი, ფსევდონიმით Kay Flock, კომპოზიციას Shake It და მასზე გადაღებულ ვიდეორგოლს ავრცელებს. ნამუშევარში ცნობილი მუსიკოსი ქარდი ბი, ასევე ჰიპ ჰოპ არტისტები Dougie B და Bory300 მონაწილეობენ. ჩანაწერის ინსტრუმენტალში მომღერალ Akon-ის ჰიტი Bananza (Belly Dancer) არის გამოყენებული.
“მე, უბრალოდ, ჩემი საქმის კეთებას ვაგრძელებ. ასევე, ვეხმარები სხვა არტისტებს, რომლებიც დრილ მუსიკას ქმნიან. მათ ჩემს ნამუშევრებში ვახვედრებ. ინდუსტრიაში ყოფნა ბევრს არაფერს ნიშნავს. ის ვარ, რაც ვიყავი. თუ მილიონ დოლარს ან მეტს ვიშოვი, ჩემი ხალხიც იშოვის”, – აღნიშნა ქეი ფლოქმა გასულ ნოემბერს Billboard-თან ინტერვიუში.
აღსანიშნავია, რომ ქარდიმ ტრეკის დასაანონსებლად ტვიტერის გაუქმებული ანგარიში აღადგინა. “დაელოდეთ Shake it-ის კლიპი შუაღამით გავრცელდება”. შემსრულებელმა წინა ნამუშევარი, სამერ უოქერთან და სიზასთან ერთად ჩაწერილი ჰიტის No Love ალტერნატიული ვერსია სამი კვირის წინ გამოაქვეყნა.
18 წლის ქეი ფლოქი საზოგადოებამ კომპოზიციებით Being Honest, Is Ya Ready და PSA, ასევე, ფავიო ფორეინთან და ლილ თიჯეისთან ერთად შექმნილი ნამუშევრით Not In The Mood გაიცნო. სადებიუტო ჩანაწერი The D.O.A. Tape მან 2021 წლის ნოემბერში გამოაქვეყნა. დეკემბერში მუსიკოსი პოლიციამ მკვლელობის ბრალდებით დააკავა.
