22 წლის ამერიკელ რეპერს, ლონტრელ უილიამს უმცროსს, ფსევდონიმით Pooh Shiesty, მაიამის ფედერალურმა სასამართლომ ხუთი წლისა და სამი თვის ვადით თავისუფლების აღკვეთა მიუსაჯა. 22 წლის ტენესელ არტისტს ბრალად ედებოდა ცეცხლსასროლი იარაღის ფლობა ძალადობისა და ნარკოდანაშაულის ჩადენის მიზნით. აღსანიშნავია, რომ პროკურორებთან თანამშრომლობის შედეგად მას სამი ბრალდება მოეხსნა, მათ შორის იარაღიდან გასროლა, რაც უფრო მძიმე დანაშაულია.
საქმე ეხება 2020 წლის ოქტომბერში ფლორიდაში, ბეი ჰარბორ აილენდსზე მდებარე სასტუმროში Landon Hotel მომხდარ შემთხვევას, სადაც რეპერი მეგობრებთან ერთად მარიხუანისა და სპორტული ფეხსაცმლის შესაძენად მივიდა. გამყიდველებთან შეხვედრა კი სროლით დასრულდა.
ჰიპ ჰოპ არტისტს ბრალი 2021 წლის ივნისში წარუდგინეს, იარაღის ფლობისა და გასროლის გარდა, მას ყაჩაღობის ორ შემთხვევაში ადანაშაულებდნენ.
ფუ შაისთის რეპერ გუჩი მეინის 1017 Records-თან და გავლენიან ლეიბლ Atlantic Records-თან აქვს კონტრაქტები გაფორმებული. მან პოპულარობა 2020 წლის სინგლით Back in Blood მოიპოვა, რომელიც მუსიკოს Lil Durk-თან ერთად ჩაწერა. 2021 წელს შემსრულებელმა სადებიუტო მიქსტეიპი Shiesty Season გამოუშვა, რომელმაც Billboard 200-ის ჩარტში მესამე ადგილი დაიმსახურა.
