სააუქციონე სახლი Heritage მაისში დაგეგმილ აუქციონზე ბურთს Super Bowl LVI გაყიდის, რომელზეც 2022 წელს ნაციონალური საფეხბურთო ლიგის ფინალური მატჩის შოუში მონაწილე არტისტების: დოქტორ დრეს, ემინემის, მერი ჯეი ბლაიჯის, ქენდრიქ ლამარისა და ანდერსონ ფექის ავტოგრაფებია დატანილი. ლოტის ღირებულება ამჟამად 2600 აშშ დოლარს შეადგენს.
აღსანიშნავია, რომ ბურთზე არ გვხვდება სუპერბოულის შოუში მონაწილე ორი რეპერის, სნუპ დოგისა და 50 Cent-ის ავტოგრაფები. ცნობილია, რომ კალიფორნიაში, ქალაქ ინგლვუდში გამართული მატჩის მუსიკალური ნაწილის პროდიუსერი რეპერი ჯეი ზი გახლდათ.
ტაიმებს შორის გამართული შოუ დრემ და სნუპ დოგმა გახსნეს, მათ ჰიტი California Love შეასრულეს. შემდეგ მაყურებლების წინაშე 50 Cent გამოჩნდა, რომელმაც 2003 წლის კომპოზიცია In Da Club წარმოადგინა. არენბი არტისტმა, მერი ჯეი ბლაიჯმა Family Affair და No More Drama იმღერა, რასაც ქენდრიქ ლამარის Alright მოჰყვა. ემინემის გამოსვლისას დრამზე ანდერსონ ფექი უკრავდა. შოუ დრემ და სნუპ დოგმა დახურეს ერთობლივი ნამუშევრით Still D.R.E.
