კალიფორნიელი მომღერალი, ქეილანი ფერიში რიგით მესამე სტუდიურ ალბომს Blue Water Road ავრცელებს. გრემის ორგზის ნომინანტი შემსრულებლის ჩანაწერში მოწვეული არტისტების რანგში გვხვდებიან: ჯასტინ ბიბერი, ჯესი რეიესი, სიდი, Blxst და სხვები. 13-ტრეკისგან შემდგარი ნამუშევრის პროდიუსერები პოპ ვენსელი და ოუკი არიან.
Blue Water Road პირველი ჩანაწერია 2020 წლის სტუდიური ალბომის It Was Good Until It Wasn’t შემდეგ, რომელიც Billboard 200-ის ჩარტში მაშინ მეორე ადგილზე გავიდა.
ქეილანი ფერიშმა მუსიკალური კარიერა 2009 წელს დაიწყო. თავდაპირველად ის ჯგუფში Poplyfe მოღვაწეობდა. სადებიუტო მიქსტეიპი Cloud 19 მომღერალმა 2014 წელს გაავრცელა, სამ წელიწადში კი პირველი სრულმეტრაჟიანი ჩანაწერი SweetSexySavage გამოსცა. არტისტის დისკოგრაფია დღეს სამ სტუდიურ ალბომს ითვლის. მუსიკოსს განსაკუთრებული წარმატება კომპოზიციამ Gangsta მოუტანა, რომელიც მან ფილმისთვის Suicide Squad დაწერა. ტრეკზე გადაღებულმა კლიპმა იუთუბზე 370 მილიონზე მეტი ნახვა დააგროვა.
