გრემის მფლობელი ჰიპ ჰოპ არტისტი, ნიკი მინაჟი ქალაქ ნიუ იორკში გამართულ Met Gala-ს დაესწრო. წლის ყველაზე სანახაობრივ ღონისძიებაზე მუსიკოსი ბეისბოლის კეპითა და შავი კაბით გამოჩნდა, რომლებიც ექსკლუზიურად მისთვის მოდის სახლ Burberry-ს შემოქმედებითმა დირექტორმა, იტალიელმა დიზაინერმა, რიკარდო ტიშიმ შექმნა.
• ნახეთ: ნიკი მინაჟმა კომპოზიციაზე We Go Up კლიპი გადაიღო
რაც შეეხება კაბას, ის ზედა ნაწილში ბუმბულებით იყო გაფორმებული, წელზე კი ტყავის ფართო ქამარი ჰქონდა დამაგრებული. მუსიკოსს აგრეთვე ტყავის ლეგინსი და მაღალქუსლიანი ჩექმები ეცვა. ნიკის მაკიაჟსა და სახესა და სხეულზე თვლების დამაგრებაზე ცნობილმა ვიზაჟისტმა, პეტ მაკგარტმა იმუშავა.
წლევანდელი “მეთ გალას” ორგანიზატორები ლინ-მანუელ მირანდა, რეჯინა კინგი, ბლეიქ ლივლი და რაიან რეინოლდსი გახლდნენ. საღამოს თემად “ამერიკული მოდის ანთოლოგია” იყო დასახელებული, რაც ითვალისწინებდა გვიანი მე-19 საუკუნის სამოსის თანამედროვე ხედვით მორგებას.
ნიკი მინაჟმა მუსიკალური კარიერა 2004 წელს დაიწყო. თანამედროვე ჰიპ ჰოპის ერთ-ერთი ყველაზე პოპულარული ქალი შემსრულებლის წარმატება დიდწილად გაერთიანებას Cash Money Records უკავშირდება. რეპერის შემოქმედება კომერციულად წარმატებულ 4 სტუდიურ ალბომსა და არაერთ კოლაბორაციულ ნამუშევარს აერთიანებს. მუსიკოსი გრემის 10 ნომინაციაზეც იყო წარდგენილი, თუმცა, პრესტიჟული ჯილდოს მოპოვება ჯერჯერობით ვერ შეძლო. მას, მსოფლიო მასშტაბით, 100 მილიონზე მეტი ჩანაწერი აქვს გაყიდული, რის გამოც კომერციულად ერთ-ერთ ყველაზე წარმატებულ მუსიკოსად ითვლება.
