სამხრეთკორეული ბოიბენდი BTS დაანონსებული ნამუშევრის Proof შესახებ დეტალებს ავრცელებს. როგორც აღმოჩნდა, ჩანაწერი, რომლის გამოშვებაც 10 ივნისსაა დაგეგმილი, წარსულში გამოშვებული კომპოზიციების კრებული იქნება. გამოქვეყნებული ვიდეოდან ირკვევა, რომ მასში შევა სიმღერები, როგორც ახალი, ისე მოღვაწეობის ადრეულ ეტაპზე გამოცემული სტუდიური ნამუშევრებიდან, როგორებიცაა: O!RUL8,2?, Skool Luv Affair, Love Yourself: Tear, Map of the Soul: 7 და Be.
• ნახეთ: ჯიმინი და ჯონგუქი პროექტში The BTS Recipe კიმბაპს ამზადებენ
კრებულის გამოშვებასთან დაკავშირებით პლატფორმა Weverse-ზე ჯგუფის ლეიბლმა Big Hit Entertainment აღნიშნა, რომ Proof-ის შექმნა ორ მიზანს ემსახურება – “ბითიესის” ცხრა წლის იუბილეს აღნიშვნასა და “არმისთვის” ნამუშევრების ვრცელი კოლექციის მიწოდებას.
BTS სეულში 2013 წელს ჩამოყალიბდა. მუსიკოსებს განსაკუთრებული პოპულარობა სიმღერებმა Dope, Fire, DNA და I Need U მოუტანა. 2019 წელს “ბითიესი” ბილბორდის დაჯილდოებაზე საუკეთესო ჯგუფად აღიარეს. ამასთან, ის გრემის ისტორიაში პირველი სამხრეთკორეული პროექტი გახდა, რომელიც ღონისძიებაზე პერფორმანსით წარდგა. კოლექტივს დღემდე 9 სტუდიური ალბომი აქვს გამოცემული. აღსანიშნავია, რომ ბენდი მათ იაპონურ ენაზეც უშვებს. ბიჭებს ისეთ ვარსკვლავებთან უთანამშრომლიათ, როგორებიც არიან: Halsey, Megan Thee Stallion, Coldplay და სხვა.
