ამერიკული როკ ბენდი My Chemical Romance რვაწლიანი პაუზის შემდეგ ახალ კომპოზიციას The Foundations of Decay ავრცელებს.
აღსანიშნავია, რომ ბენდმა 2013 წელს დაშლის შესახებ განაცხადა და გამოსამშვიდობებელი სიმღერა Fake Your Death გამოუშვა, რომელიც მომავალ წელს გამოსულ ჰიტების კრებულში May Death Never Stop You შევიდა. კოლექტივის წევრებმა: ჯერარდ ვეიმ, რეი ტორომ, ფრენკ იერომ და მიკი ვეიმ მაშინ სოლო მოღვაწეობა არჩიეს.
ჯერარდ ვეიმ My Chemical Romance ნიუ ჯერსიში 2001 წელს შექმნა. მომდევნო წელს არტისტმა ჯგუფთან ერთად პირველი ალბომი I Brought You My Bullets, You Brought Me Your Love გაავრცელა. 2013 წელს, 4 სტუდიური ჩანაწერის გამოცემის შემდეგ, კოლექტივმა დაშლის შესახებ განაცხადა. მას შემდეგ, 2019 წელს ბენდმა რამდენიმე ერთობლივი შოუ გამართა, რასაც ტურნე მოჰყვა ავსტრალიაში, ახალ ზელანდიასა და იაპონიაში.
