ამერიკის კინოაკადემიამ კატეგორიაში “საუკეთესო ორიგინალური სიმღერა” ნომინანტების შერჩევის განახლებული წესი მიიღო. თუ აქამდე თითო ფილმიდან 5 კომპოზიციის წარდგენა იყო დაშვებული, 2023 წლის დაჯილდოებისთვის ეს ციფრი სამამდე შემცირდება. 95-ე ოსკარების ცერემონია მომავალ წელს, 12 მარტს ტრადიციულად ჰოლივუდში, დოლბის თეატრში ჩატარდება.
ამასთან, კინოაკადემია ნამუშევრების მიღების ერთწლიან პრინციპს დაუბრუნდება. კერძოდ, 2023 წლის ღონისძიებაზე მხოლოდ იმ ფილმების წარდგენა იქნება შესაძლებელი, რომლებიც 2022 წლის 1 იანვრიდან 31 დეკემბრამდე პერიოდში გამოვიდა. კორონავირუსის პანდემიის გამო წინა ორი დაჯილდოებისთვის კინოსურათები განსხვავებულ ვადებში შეირჩა.
აკადემიის მმართველმა საბჭომ აგრეთვე ორ ნომინაციას შეუსწორა სახელწოდება. კატეგორიას “დოკუმენტური” ამიერიდან “მხატვრული დოკუმენტური ფილმი” ეწოდება, ხოლო Documentary (short subject)-ს “მოკლემეტრაჟიანი დოკუმენტული ფილმი”.
განაცხადების შეტანის ბოლო ვადა ნომინაციებზე ამგვარად გადანაწილდა:
უცხოური მხატვრული ფილმი – 3 ოქტომბერი, 2022
ანიმაციური მოკლემეტრაჟიანი ფილმი – 14 ოქტომბერი, 2022
დოკუმენტური მოკლემეტრაჟიანი ფილმი – 14 ოქტომბერი, 2022
მუსიკალური თემა – 1 ნოემბერი, 2022
ორიგინალური სიმღერა – 1 ნოემბერი, 2022
ანიმაციური მხატვრული ფილმი – 15 ნოემბერი, 2022
ძირითადი კატეგორიები – 15 ნოემბერი, 2022.
