ცნობილი ამერიკელი მუსიკოსი, ანდერსონ ფექი კომპანია Vans-თან თანამშრომლობით რიგით მესამე კოლექციას Vans x Anderson .Paak Vanderson Collection აანონსებს, რომელიც ფეხსაცმელს, ტანსაცმელსა და აქსესუარებს მოიცავს.
კაფსულა კოლექცია თვის ბოლოდან გაიყიდება. აღსანიშნავია, რომ ნამუშევრების სარეკლამო კამპანიაზე აგრეთვე 36 წლის მუსიკოსმა იზრუნა. მასში სერიალის Black-ish ვარსკვლავი, მარსაი მარტინი და ანდერსონ ფექის ვაჟი, და და დისშვილები მონაწილეობენ.
ფეხსაცმლის კოლექცია შექმნილია როგორც ზრდასრული ადამიანებისთვის, ისე მოზარდებისა და პატარებისთვის.
ანდერსონ ფექმა კომპანია Vans-თან წარსულში არაერთ პროექტზე ითანამშრომლა, მათ შორისაა: .Paak House, House of Vans, Vans Musicians Wanted და Sidestripe Sessions. კოლექციის აღსანიშნავად არტისტი კონცერტს ინგლისში, House of Vans London-ში 27 ივნისს გამართავს, ერთ კვირაში კი პროექტით Silk Sonic ლას ვეგასს ეწვევა.
კალიფორნიელმა მულტიინსტრუმენტალისტმა მუსიკალური კარიერა 2009 წელს დაიწყო. ფართო საზოგადოების ყურადღება არტისტმა 2016 წლის ჩანაწერით Malibu მიიპყრო. ორი წლის შემდეგ ანდერსონმა მორიგი სტუდიური ნამუშევარი Oxnard გამოაქვეყნა, რომელმაც მას კიდევ უფრო დიდი წარმატება მოუტანა. ჩანაწერის აღმასრულებელი პროდიუსერი ლეგენდარული დოქტორ დრე გახლავთ. 2019 წელს მან ბოლო ალბომი Ventura გაავრცელა. სოლო კარიერის გარდა, ანდერსონმა პროდიუსერ Knxwledge-თან ერთად შემოქმედებითი დუეტი NxWorries ჩამოაყალიბა, ბრუნო მარსთან თანამშრომლობით კი წარმატებული პროექტი Silk Sonic. სიმღერის პარალელურად ფექი გიტარაზე, ბასზე, ფორტეპიანოსა და დასარტყამ ინსტრუმენტებზე უკრავს. მუსიკოსის შემოქმედება არენბის, ფანკის, ჰიპ ჰოპისა და სოულის ნაზავია. ანდერსონი 8 გრემის მფლობელია.
