პოპვარსკვლავი ბიონსე ახალ ალბომს Renaissance აანონსებს. ნამუშევარი გაყიდვაში 29 ივლისს ჩაეშვება. პლატფორმა Apple Music-ის წინასწარი დამატების ფუნქციის საშუალებით ირკვევა, რომ პროექტი 16 კომპოზიციას მოიცავს. ეს პირველი სრულმეტრაჟიანი ჩანაწერი იქნება 2016 წლის ნამუშევრის Lemonade შემდეგ.
• ნახეთ: ბიონსემ ოსკარების დაჯილდოებაზე Be Alive შეასრულა
ბიონსემ 2018 წელს თავის ქმართან, რეპერ ჯეი ზისთან თანამშრომლობით ჩანაწერი Everything Is Love გაავრცელა, შემდეგ იმუშავა საუნდტრეკების ალბომზე The Lion King: The Gift, სინგლზე Be Alive და ოსკაროსან ფილმზე King Richard, აგრეთვე ჰიპ ჰოპ არტისტ Megan Thee Stallion-ის გრემის მფლობელ ჰიტში Savage მიიღო მონაწილეობა.
ბიონსე ნოულს-კარტერი თანამედროვეობის ერთ-ერთი ყველაზე წარმატებული მუსიკოსია. 28 გრემის მფლობელ შემსრულებელს კარიერის განმავლობაში 120 მილიონი ჩანაწერი აქვს გაყიდული. არაერთი ჰიტის ავტორს განსაკუთრებული პოპულარობა კომპოზიციებმა Single Ladies, Crazy In Love, Irreplaceable და Formation მოუტანა. ის პირველი სოლო არტისტია, რომლის პირველი ექვსი სტუდიური ალბომი Billboard 200-ის სათავეში მოხვდა.
