შენაია ტვეინი ჰარი სტაილის დიდი გულშემატკივარია. მომღერალი იმედოვნებს, რომ მომავალში ჰარისთან თანამშრომლობის შესაფერისი დროც მოვა.
ქანთრი მომღერალმა ჰარი სტაილთან Coachella-ს სცენაზე ერთხელ უკვე შეასრულა სიმღერები Man! I Feel Like a Woman და You’re Still the One. ორშაბათს შენაიამ სატელევიზიო გადაცემაში TalkShopLive გადაცემის წამყვან ნენსი ოდელთან, მის მომავალ ალბომზე Queen of Me და ჰარი სტაილთან შესაძლო თანამშრომლობაზე ისაუბრა.
„ჰარი სტაილმა Coachella-ზე სცენაზე დამპატიჟა, სადაც ერთად ვიმღერეთ. იგი ძალიან საყვარელი ადამიანია, მინდოდა მეთქვა საყვარელი ბავშვი, მაგრამ უკვე ბავშვი აღარ არის, მამაკაცია, ასე არ არის? მასთან თანამშრომლობა ჩემი ოცნებაა. ვიცი, რომ დაკავებულია და ფილმზე მუშაობს, თუმცა დარწმუნებული ვარ, ეს ჯადოქრობა აუცილებლად მოხდება“.
რაც შეეხება შენაია ტვეინის უახლეს ალბომს Queen of Me, მან TalkShopLive-ში საუბრისას აღნიშნა, რომ პანდემიამ სიმღერების დასაწერად დიდი შესაძლებლობა და დრო მისცა. საგანგებო პერიოდი მომღერლისთვის ნაყოფიერი აღმოჩნდა, რა დროსაც მომღერალმა ალბომ Queen of Me-თვის სიმღერები შექმნა.
„კოვიდ პანდემიამ იმაზე მეტი დრო მომცა, ვიდრე ამას ველოდი. ამ პერიოდში ვიმუშავე ოთხ ალბომზე, ეს მხოლოდ დასაწყისია, ძალიან პროდუქტიული ვიყავი, ბევრი სიმღერა შეიქმნა. ალბომი Queen of Me– ფოკუსირებულია იმაზე, თუ რისი გამოხატვა მსურს: იყავი შენი თავის დედოფალი, შენი თავის უფროსი და აიღე პასუხისმგებლობა კარგზეც და ცუდზეც. ასე რომ, სიმღერები ბუნებრივად ჩაჯდა თავის ადგილზე“.
ინტერვიუს დროს შენაიას ჰკითხეს, ნამდვილად ოთხ ცალკეულ ალბომზე იყო თუ არა საუბარი, რა დროსაც მან განმარტა: „დიახ, ნამდვილად ასეა, თუმცა სამწუხაროდ ეს ალბომები მალე ვერ იხილავენ დღის სინათლეს. ვფიქრობ, ცოტა ხანი მოცდა მოგვიწევს. გამომდინარე იქიდან, რომ ჯერ ტურნე მაქვს და ბევრი სხვა ახალი პროექტი დაგეგმილი. შესაძლოა ამ ალბომების გამოშვებას წელიწადი ან შეიძლება რამდენიმე წელიც დასჭირდეს.“
ალბომი Queen of Me 2023 წლის 3 თებერვალს Republic Nashville-ის მეშვეობით გამოვა.
