უილ სმითი ოსკარის „საშინელ ღამეს” იხსენებს: „გულნატკენი ადამიანები სხვებს სტკენენ გულს”

2022 წლის „ოსკარის“ დაჯილდოებიდან 8 თვე გავიდა. მაშინ უილ სმითი სცენაზე აიჭრა და კრის როკს სახეში გაარტყა. 

ინციდენტი მას შემდეგ მოხდა, რაც როკმა სცენიდან სმითის ცოლს – ჯეიდა პინკეტ სმითს მიმართა: „ჯეიდა, მიყვარხარ. G.I Jane 2, ერთი სული მაქვს ეს ვნახო”, – იხუმრა მსახიობმა ჯეიდას ალოპეციისგან გამოწვეულ გადაპარსულ თავზე.

ამ დროს უილ სმითი სცენაზე ავიდა და კრის როკს სახეში გაარტყა. შემდეგ კი თავისი ადგილიდან უყვიროდა: „ჩემი ცოლის სახელს ნუ ახსენებ.”

ინციდენტის შემდეგ სმითმა ინსტაგრამით ბოდიში მოიხადა. ახლა კი ამ თემაზე მსახიობმა ტრევორ ნოასთან The Daily Show-შიც ისაუბრა და მას „საშინელი ღამე” უწოდა.

„არავინ იცის, ვის რა პრობლემა აქვს. მე იმ ღამეს მქონდა რაღაც პრობლემა. თუმცა ეს საერთოდ არ ამართლებს ჩემს საქციელს. მე ჩემი პრობლემებით სხვებს შევუქმენი პრობლემები. ზუსტად Მივხვდი ფრაზის შინაარსს: „გულნატკენი ადამიანები სხვებს სტკენენ გულს.” 

ტრევორ ნოამ სმითს მისივე მოგონებები გაახსენა, თუ როგორ იზრდებოდა კონფლიქტის შიშით.

„ის იყო პატარა ბიჭი, რომელიც ხედავდა, როგორ სცემდა მამა დედას. ეს ყველაფერი ამოტივტივდა იმ მომენტში. ეს არ არის ის, ვინც მე მინდა, რომ ვიყო.”