2023 წლის Super Bowl-ის სატელევიზიო ეთერში კომპანიებმა სპეციალურად ამ დღისათვის გადაღებული რეკლამები ტრადიციისამებრ წარადგინეს. Dunkin’ Donuts-ის რეკლამა ერთ-ერთი გამორჩეული ვიდეო აღმოჩნდა, რადგან მასში ბენ აფლეკი და ჯენიფერ ლოპესი მონაწილეობენ.
ვიდეოში ბენ აფლეკი Dunkin-ის თანამშრომლის ამპლუაშია და თავის თაყვანისმცემლებისგან თავადვე იღებს შეკვეთას. რეკლამაში ოსკაროსან მსახიობს ფანებთან კომუნიკაციაც აქვს და ერთ-ერთ მათგანთან ერთად ე.წ. Სელფისაც იღებს. მოულოდნელად შეკვეთის მიმღებ ჯიხურთან ავტომობილი ჩერდება, რომლის საჭესთანაც ჯენიფერ ლოპესი ზის. „აქ რას აკეთებ?“ – მიმართავს გაკვირვებული ლოპესი ბენ აფლეკს.
როგორც ცნობილია, ვიდეოში რეალური სცენებია ასახული და ბენ აფლეკი გამვლელებს მართლაც მოემსახურა. Dunkin-ის ერთ-ერთმა იღბლიანმა მომხმარებელმა მედიასთან ეს შემთხვევაც გაიხსენა და თქვა, რომ მისი შეკვეთა მართლაც მსახიობმა მიიღო, შემდეგ კი ყავაც შესთავაზა.
აღსანიშნავია, რომ ბენ აფლეკი Dunkin-ის დიდი მოყვარულია და მას ამ ბრენდის ცივი ყავით ხელში პაპარაცები არაერთხელ აფიქსირებენ.
