Memento Mori, ასე ჰქვია Depeche Mode-ის უახლეს ალბომს და მიმდინარე მსოფლიო ტურნეს. სახელწოდება ცნობილი ლათინური გამოთქმაა, რომელიც ითარგმნება, როგორც – „გახსოვდეს, რომ სიკვდილი გელის“. გასულ წელს Depeche Mode-ის ერთ-ერთი დამფუძნებელი, მუსიკოსი ენდი ფლეტჩერი გარდაიცვალა. მიმდინარე საკონცერტო ტურისა და ალბომის სახელწოდება სიმბოლურად მომხდარ ამბავს ეხმიანება.
დევიდ გაანისა და მარტინ გორის შემადგენლობით, Depeche Mode-მა 14 აპრილს ნიუ იორკში, Madison Square Garden-ში კონცერტი გამართა. ჯგუფის სინთ-პოპის ჟანრის მუსიკა, რომელიც ათწლეულების განმავლობაში პესიმიზმითა და სიმძიმით ხასიათდებოდა, ამჯერად ენერგიული და სიცოცხლისუნარიანი იყო.
როგორც ამერიკული Billboard აღწერს, გაანი სცენაზე ყოფნისას, თითქოს, ზებუნებრივ ენერგიას ფლობდა. მუსიკალური შოუს დროს გაჟღერდა ბენდის მიერ სხვადასხვა წლებში დაწერილი ისეთი ცნობილი კომპოზიციები, როგორებიც არის: Precious, John the Revelator, World in My Eyes.
