ტინა ტერნერის გარდაცვალების შემდეგ მომღერლის ფანებმა მისი შემოქმედება მასშტაბურ რიცხვებში გაიხსენეს. მომღერლის გარდაცვალების დღიდან ერთი კვირის განმავლობაში მისმა სიმღერებმა 40 მილიონზე მეტი მოსმენა დააგროვა. წინა კვირის, 17-23 მაისის მონაცემები 2.7 მილიონი იყო, რაც იმას ნიშნავს, რომ ტერნერის გარდაცვალების შემდეგ მისი სიმღერების სტრიმის რაოდენობა ერთ კვირაში 1367%-ით გაიზარდა.
ტერნერის სიმღერებს შორის მოსმენებით ლიდერობს What’s Love Got To Do With It – 7.2 მილიონი კლიკით, რაც წინა შვიდი დღის მონაცემებთან შედარებით 686%-იანი ზრდაა. სწორედ ეს სიმღერა გახდა მომღერლის საკულტო დაბრუნების სიმბოლო და ბილბორდის „ცხელ ასეულში” პირველი ადგილიც მოიპოვა. სინგლმა ტერნერს ორი გრემი მოუტანა.
ყველაზე მეტჯერ მოსმენილ სიმღერებში მეორე ადგილი 4.5 მილიონი კლიკით Simply the Best-მა დაიკავა. მომღერლის გარდაცვალების შემდეგ ყველაზე ხშირად სწორედ ამ ფრაზით მოიხსენიებენ მას სიტყვით გამოსვლებსა თუ სოციალურ მედიაში.
მესამე ადგილზე კი ტინასა და მისი ყოფილი მეუღლის აიკ ტერნერის 1971 წლის ჰიტი Proud Mary მოხვდა 3.9 მილიონი სტრიმით.
24-30 მაისის პერიოდში, ანუ ტერნერის გარდაცვალებიდან ერთი კვირის განმავლობაში მისი სიმღერები 78 000-ჯერ გადმოწერეს, რაც წინა კვირის მონაცემთან შედარებით 6 238%-იანი ნახტომია.
ტინა ტერნერი 24 მაისს 83 წლის ასაკში შვეიცარიაში, საკუთარ სახლში გარდაიცვალა.
