ანდრეა ბოჩელის შესახებ დოკუმენტური ფილმი გამოვა

24 აგვისტოს კომპანია Entertainment One-მა განაცხადა, რომ იტალიელი სუპერვარსკვლავის ანდრეა ბოჩელის შესახებ დოკუმენტურ ფილმს დააფინანსებს.

დოკუმენტურ ფილმ Because I Believe-ს იტალიასა და ამერიკაში გადაიღებენ. ფილმი 64 წლის მომღერლის ანდრეა ბოჩელის მუსიკალურ ნიჭსა და პირად ცხოვრებაზე მოგვითხრობს.

ფილმს იტალიელი რეჟისორი კოსიმა სპენდერი გადაიღებს, აღმასრულებელი პროდიუსერები თავად მუსიკოსი ანდრია ბოჩელი, მისი მეუღლე ვერონიკა ბოჩელი და სკოტ როჯერსიც იქნებიან. 

„დიდი პრივილეგიაა, როდესაც სხვა ადამიანის სამყაროს აღსაწერად გიწვევენ, განსაკუთრებით მაშინ თუ ეს ადამიანი ანდრეა ბოჩელია.  მე და ანდრეა ბოჩელის ბევრი რამ გვაკავშირებს, ჩვენ ტოსკანას რეგიონში ერთსა და იმავე სოფლელში დავიბადეთ და გავიზარდეთ, ეს კი იმას ნიშნავს, რომ იუმორის გრძნობა, ცხოვრებისადმი დამოკიდებულება და  ერთი და იგივე ადგილისადმი მიჯაჭვულობა გვაერთიანებს.“-ამბობს კოსიმა სპენდერი.

„ეს ფილმი მსოფლიოს უსაყვარლესი ტენორის ცხოვრების შესახებ გვიყვება. ჩემთვის დიდი პატივია ანდრეასთან, მის ოჯახთან, მეგობრებთან და კოლეგებთან მუშაობა. ასევე დიდი პატივია ამ უნიკალურ პროექტზე რეჟისორ კოსიმა სპენდერთან თანამშრომლობა და მისი მხარდაჭერა.“ – თქვა  ფილმის პროდიუსერმა იან იანგჰასბენდმა.

დოკუმენტური ფილმი  Because I Believe უკვე წარმოებაშია და მისი გამოშვება მომავალ წელს იგეგმება. ფილმის პრემიერა  ანდრეა ბოჩელის მუსიკალურ ინდუსტრიაში მოღვაწეობის ოცდაათი წლის იუბილეს დაემთხვა.