„სილქ როუდ ჯგუფმა“, კინოსტუდია WonderHill Studios და ამერიკულმა საინვესტიციო და საკონსულტაციო კომპანიამ ESTech, საქართველოს მთავრობასთან თანამშრომლობით, ხელი მოაწერეს მემორანდუმს, რომელიც საქართველოში ერთობლივი საწარმოს – WonderSilk Studios (WSS) დაარსებას ითვალისწინებს. WonderSilk Studios კინოწარმოებისა და კინოს დაფინანსების მიმართულებით იმუშავებს და ქართული კინოინდუსტრიისათვის დიდ პერსპექტივას შექმნის. პროექტის მნიშვნელობას აფასებენ ჰოლივუდიდან ჩამოსული სტუმრები და პარტნიორობაში დიდ პერსპექტივას ხედავენ.
შეხვედრას ესწრებოდა WonderHill Studios თანადამფუძნებელი და აღმასრულებელი დირექტორი, მარვინ პერტი. „ყოველთვის ვოცნებობდი გლობალურ კინემატოგრაფიულ სამყაროში ხიდები ამეგო“ – აღნიშნა მან.
მემორანდუმის მნიშვნელობაზე ისაუბრა Silknet-ის სამეთვალყურეო საბჭოს თავმჯდომარემ, გიორგი რამიშვილმა:
„ძალიან ვამაყობ, რომ WonderHill Studios ჩვენი პარტნიორი გახდა. ვამაყობ, რომ ამ ყველაფრის ნაწილი ვარ. ვფიქრობ, რომ ეს ძალიან წარმატებული პროექტი იქნება ინვესტიციის, კულტურისა და პოლიტიკის თვალსაზრისით. საქართველოსა და ამერიკის ურთიერთობა კიდევ უფრო გამყარდება, შეიქმნება კიდევ უფრო მეტი სამუშაო ადგილი და სხვადასხვა ბიზნესი.“
როგორც მარვინ პერტიმ „ევრონიუს ჯორჯიასთან“ საუბრისას თქვა, თუკი თავდაპირველად 50 მილიონი დოლარის ინვესტიციის ჩაიდება, ამ ბიუჯეტით ორი-სამი მასშტაბური პროექტის შექმნა იქნება შესაძლებელი.
კომპანია ESTech-ის დირექტორთა საბჭოს თავმჯდომარემ კარ ბეტისმა პროექტი უნიკალურ პლატფორმად შეაფასა, რომელიც მსოფლიო მაყურებელს საქართველოსა და ცენტრალური აზიის მდიდარი კინოკულტურას წარუდგენს.
„ლეგენდარულმა იტალიელმა რეჟისორმა ფედერიკო ფელინიმ, რომელიც ქართული კინოს დიდი თაყვანისმცემელი იყო, ყველაზე კარგად თქვა: „ქართული ფილმი სრულიად უნიკალური ფენომენია…“ – მიმართა პარტნიორებს კარ ბეტისმა.
წინანდალში დაწყებული პარტნიორობის მიზანია, რომ ჰოლივუდის სტუდიებსა და ინდი ფილმების პროდიუსერებს შესთავაზოს ადგილობრივი სივრცეების, სტუდიებისა და ტალანტების კინოწარმოებაში ჩართვის შესაძლებლობა. მომავალი წლისათვის, Wonder Silk Studios (WSS) საქართველოსა და ყაზახეთში 200 მილიონ დოლარზე მეტი ღირებულების კინოპროექტების შემოტანას გეგმავს.
