შავი ისტორიის თვის მოახლოებასთან ერთად ვრცელდება ინფორმაცია ჯეიმს ბრაუნის შესახებ გადაღებული დოკუმენტური ფილმის James Brown: Say It Loud-ის პრემიერაზე. „ფილმი გვიყვება ბრაუნის რთულ ცხოვრებასა და იმ უზარმაზარ გავლენაზე, რომელიც მას დღემდე აქვს მუსიკასა და კულტურაზე,” – ვკითხულობთ ფილმის აღწერაში. ოთხნაწილიანი დოკუმენტური სერიალის პრემიერა ორი დღის განმავლობაში, 19 და 20 თებერვალს შედგება. 26 თებერვალს კი მისი ექსკლუზიური პრემიერა Billboard-ზე გაიმართება.
„ის იყო საოცარი შემსრულებელი, რომელიც თავიდანვე გახდა ჩემი შთაგონების წყარო. გარდა ამისა, მას უდიდესი წვლილი აქვს სამოქალაქო უფლებების მოძრაობაში. მე ყოველთვის ვაღიარებდი ჯეიმსს და მისგან ძალიან ბევრი რამ ვისწავლე,” – ამბობს მიკ ჯაგერი პრესრელიზში. მუსიკოსი ფილმის მონაწილე და ერთ-ერთი აღმასრულებელი პროდიუსერიცაა. ტრეილერში ჯაგერი იმ გავლენაზე საუბრობს, რაც ბრაუნმა მასზე მოახდინა.
James Brown: Say It Loud-ის რეჟისორი დებორა რაილი დრეპერია. ფილმში წარმოდგენილია ბრაუნის აქამდე უცნობი საარქივო ინტერვიუები და გამოსვლები. დოკუმენტური სერიალი ასახავს მუსიკოსის რთულ მოგზაურობას მეშვიდე კლასში გამოგდებიდან „შოუ ბიზნესის ყველაზე შრომისმოყვარე ადამიანის” ტიტულის მოპოვებამდე. ჯაგერთან ერთად ფილმში მონაწილეობენ სხვა არტისტებიც, ბრაუნის ოჯახის წევრები და მეგობრები.
„ჯეიმს ბრაუნის ცხოვრება მნიშვნელოვანია არა მხოლოდ მისი უზარმაზარი მუსიკალური გავლენის გასააზრებლად, რომელიც დღემდე შთაგვაგონებს არტისტებს, არამედ იმ ღრმა და ხანგრძლივი გავლენის მხრივ, რაც მას ამერიკულ კულტურაზე აქვს,” – აღნიშნავენ Questlove და Black Thought. „ბრაუნის ცხოვრება სასიცოცხლოდ მნიშვნელოვანი და თანადროული ამბავია ბრძოლის, განთავისუფლებისა და თვითიდენტურობის და ჩვენ პატივი გვაქვს, რომ ის გავაზიაროთ.”
