ყოველდღიური ცხოვრებისეული შემთხვევები, როგორც წესი, მუსიკოსების თავში გროვდება და თუ გაუმართლათ, ეს ინციდენტები შემდეგ სიმღერების ტექსტებში ტრანსფორმირდება და სამუდამოდ რჩება. არაერთი ასეთი შემთხვევა ჰქონია პოლ მაკარტნისაც. ერთ-ერთ მათგანზე მომღერალმა A Life in Lyrics პოდკასტის ბოლო ეპიზოდში ისაუბრა.
ეპიზოდი ეხებოდა Beatles-ის ჰიტს Yesterday, რომელიც 1965 წელს შევიდა ჯგუფის ალბომში Help!. ეს მაკარტნის სოლო სიმღერაა, სადაც ის სიმებიანი კვარტეტის თანხლებით აკუსტიკურ გიტარაზე უკრავს.
მაკარტნიმ ყურადღება გაამახვილა სიმღერის ფრაზაზე: I said something wrong, now I long for yesterday (რაღაც არასწორი ვთქვი და ახლა გუშინდელ დღეს ვნატრობ) და გაამხილა, რომ ეს სიტყვები წლების წინ დედასთან გულდასაწყვეტი საუბრით იყო შთაგონებული. „ხანდახან მხოლოდ რეტროსპექტივაში შეგიძლია, ეს დააფასო,” აღნიშნა მომღერალმა და გაიხსენა დღე, როცა, მისი თქმით, დედას აწყენინა.
მაკარტნი ჰყვება, რომ ერთ დღეს ის და თავისი დედა, რომელსაც, მომღერლის თქმით, ე.წ. Სამეფო (posh) აქცენტი ჰქონდა, ეზოში ისხდნენ. „ის წარმოშობით ირლანდიელი იყო, ექთანი, ასე რომ, ცოტა უფრო მაღლა იდგა. იმ დღეს საუბრისას თავისებური აქცენტით მთხოვა, ვიღაცისთვის რაღაც მეკითხა. მე კი შენიშვნა მივეცი სიტყვის Ask გამოთქმაზე და დავიწყე: „Arsk! Arsk! დედა, ask უნდა თქვა.” მას კი შერცხვა. შემდეგ გამახსენდა და ვიფიქრე: „ღმერთო, ნეტავ, ეს არასდროს მეთქვა მისთვის” და ეს ჩემს გონებაში ჩარჩა. მისი გარდაცვალების შემდეგ კი განსაკუთრებით ვნატრობდი, რომ ეს არ მეთქვა.” მაკარტნის დედა, მერი, 47 წლის ასაკში გარდაიცვალა, როცა მომღერალი 14 წლის იყო.
მაკარტნის თქმით, მას ცხოვრებაში რამდენიმე ასეთი პატარა შემთხვევა ახსოვს და იცის, რომ ის ადამიანები აუცილებლად აპატიებდნენ. თუმცა, მიუხედავად ამისა, მაინც სურს, ჰქონდეს საშლელი, რომლითაც Yesterday-ში აღბეჭდილ ამ მომენტის წაშლას შეძლებდა.
პოლ მაკარტნის პოდკასტს შეგიძლიათ მოუსმინოთ ბმულზე.
