8-21 მარტს კრისტის აუქციონის სახლი გასაყიდად ბრიტანელი ფოტოგრაფისა და მოდელის, ასევე ცნობილი მუსიკოსების, ჯორჯ ჰარისონისა და ერიკ კლეპტონის მუზის, პატი ბოიდის პირად ნივთებს გაიტანს.
26 თებერვალს გამოცემული პრეს-რელიზის თანახმად, კრისტის აუქციონზე „როკ-ისტორიაში ერთ-ერთ უდიდეს მუზად“ მიჩნეული პატი ბოიდის პირადი ნივთები გაიყიდება. ბოიდი ჯორჯ ჰარისონზე The Beatles-ის პოპულარობის ზენიტში დაქორწინდა და მისი შთაგონებით შეიქმნა იმდროინდელი ლეგენდარული სიმღერები I Need You (1965), ბილბორდის საუკეთესო 100-ეულის ლიდერი სიმღერა Something (1969) და ასევე For You Blue (1970).
მოგვიანებით, ჰარისონის ახლო მეგობარი ერიკ კლეპტონი პატის სასიყვარულო წერილებს წერდა და ამ წერილების ნაწილი ახლა აუქციონზე გაიყიდება. „გწერ ამ წერილს იმისთვის, რომ გავერკვე შენს გრძნობებში, რომლებიც უკვე კარგად ნაცნობია შენთვის. მინდა ერთი რამ გკითხო, ისევ გიყვარს მეუღლე? ან სხვა ხომ არ შეიყვარე. ეს ყველა კითხვა ალბათ უაზროდ გეჩვენება, ვიცი, მაგრამ, მინდა ვიცოდე შენს გულში თუ არის ჩემს მიმართ გრძნობა დარჩენილი. მე უნდა ვიცოდე ეს.“
1974 წელს პატი ბოიდი ჯორჯ ჰარისონს დაშორდა და ხუთი წლის შემდეგ ერიკ კლეპტონს გაჰყვა ცოლად, თუმცა 1987 წელს მასაც დაშორდა. ერიკ კლეპტონის შემოქმედებიდან პატი ბოიდი, თამამად შეიძლება ითქვას, სიმღერა Layla-ს შთაგონების წყარო იყო. Ეს სიმღერა გრემის დიდების დარბაზშია შეყვანილი.
„ვფიქრობდი, მჭირდებოდა თუ არა ისინი, უნდა შემენახა თუ არა ეს ყველაფერი პანდორას ყუთში. მე ვტკბებოდი ამ წერილებით მრავალი წლის განმავლობაში და ვფიქრობ, რომ ახლა ისინი სხვებმაც უნდა ნახონ. სწორედ ამიტომ გამომაქვს ისინი გასაყიდად“, – ამბობს პატი ბოიდი.
აუქციონზე ასევე გაიტანენ ჯორჯ ჰარისონისა და ერიკ კლეპტონის ფოტოებს. აუქციონი მარტში გაიმართება.
