მიკ ჯაგერი ამერიკის ეროვნულ კოსმოსურ სააგენტოს სტუმრობდა. The Rolling Stones-ის ვოკალისტმა NASA-ს სათაო ოფისი საკონცერტო ტურნეს წინ მოინახულა. ვიზიტის ამსახველი ფოტოები მიკ ჯაგერმა სოციალურ ქსელში ატვირთა და NASA-ს გუნდს მასპინძლობისათვის მადლობა გადაუხადა.
გამოქვეყნებულ ფოტოებში 80 წლის ჯაგერი მისიის მართვის ცენტრშია გადაღებული. კადრებში ასევე აღბეჭდილია, თუ როგორ გაეცნო მუსიკოსი მთვარის კვლევის მისიის სიმულაციას ვირტუალური რეალობის თავსაბურავით. მუსიკოსმა სამახსოვრო ფოტოები NASA-ს ასტრონავტებთან ერთადაც გადაიღო.
28 აპრილს The Rolling Stones-მა 26-ე სტუდიური ალბომის, Hackney Diamonds-ის მხარდამჭერი საკონცერტო ტურნე დაიწყო. მიკ ჯაგერი, კით რიჩარდსი და რონი ვუდი მუსიკალურ შოუს 16 ქალაქში გამართავენ. Hackney Diamonds 2023 წელს გამოვიდა და ის ბენდის ახალ სიმღერებს აერთიანებს. Hackney Diamonds-ის გამოცემამდე ახალი კომპოზიციებისგან შემდგარი სტუდიური ჩანაწერი ბენდმა 2005 წელს გამოუშვა.
