დისნეი ჯუნიორი მალე პატარა მაყურებელს ახალ ანიმაციურ სერიალს შესთავაზებს, სახელწოდებით „არიელი”. სერიალი პატარა ქალთევზას მოგზაურობასა და წყალქვეშა მხიარულებას მიჰყვება ოჯახთან და მეგობრებთან ერთად.
„ვერც კი აღგიწერთ იმ ენთუზიაზმს, რაც ჩვენს სამუშაო სივრცეშია ამ პროექტთან დაკავშირებით,” – აღნიშნავს სერიალის აღმასრულებელი პროდიუსერი ლინ საუზერლენდი „ბილბორდთან” საუბარში. „ჩვენთვის დიდი პატივია, ჯადოსნური არიელის ახალ სივრცეში შემოყვანა, მისი ახლებურად და ახალი აუდიტორიისთვის დანახვება.”
კითხვაზე, თუ როგორ განსხვავდება არიელის ეს ვერსია ორიგინალი 1989 წლის პრინცესისგან ან 2023 წლის ფილმის გმირისგან, საუზერლენდი ამბობს, რომ დისნეი ჯუნიორის ქალთევზა მცირეწლოვანია, მაგრამ თვითდაჯერებული. „ჩემთვის ძალიან მნიშვნელოვანი იყო, რომ არიელს ჰქონოდა თავდაჯერებულობის გრძნობა, ის, რომ 8 წლის ასაკში მან უკვე იცის, ვინ არის. ჩვენ ვუყურებთ, თუ როგორ იზრდება ის და მისი წარმოდგენაც საკუთარ თავზე ფართოვდება.”
Პატარა არიელს 12 წლის მსახიობი მაიკალ-მიშელ ჰარისი ახმოვანებს. „ამ ვერსიაში ჩვენ ვხედავთ ყველაზე პატარა არიელს, რაც კი აქამდე გვინახავს, ამიტომ მნიშვნელოვანი იყო, რომ მისთვის ისეთი თვისებები მიგვემატებინა, რომლებიც შესაძლოა მცირე ასაკში ჰქონოდა,” – ამბობს ჰარისი. მისი აზრით, პატარა მაყურებელი ამ სერიალიდან გაიგებს, რომ „უნდა იყო ის, ვინც ხარ, უნდა გიყვარდეს შენი თავი და მოგწონდეს ის, რაც მოგწონს.”
სერიალის ერთ-ერთი მთავარი ელემენტი ასევე არის არიელის ურთიერთობა მამასთან – ტრიტონთან. „თითქოს, ასეთი აღქმაა შავკანიანი მამების, რომ ისინი მკაცრები არიან. ჩვენთვის ძალიან მნიშვნელოვანი იყო იმის ჩვენება, რომ, მიუხედავად იმისა, რომ ტრიტონი მეფეა, როცა ის შვილებთანაა, უბრალოდ მამაა, რომელსაც ესმის მათი და უყვარს ისინი,” – ამბობს საუზერლენდი.
„არიელის” პრემიერა 27 ივნისს შედგება.
