ელენე გიგანის მუსიკალური პროექტი Deena ორი წელია რაც არსებობს და მუსიკალურ სივრცეში არტისტმა უკვე დაიკავა თავისი ადგილი. მისი დებიუტი Didube Records-ზე ალბომ Low Love-ის გამოცემით დაიწყო და არტისტის თქმით უახლოეს მომავალში მსმენელი ახალ ალბომს უნდა ელოდოს.
29 ივნისს Mtkvarze გამართულ ლაივ კონცერტზე Deena-სთან ერთად Didube Records-ის კიდევ ერთი არტისტი, 10G$ (თენგიზ მჟავია) წარდგა, რომელიც ჰიპ-ჰოპ ჯგუფ MoonG-ის წევრი გახლავთ. არტისტებმა სამი სიმღერა შეასრულეს ერთად, მათ შორის ახალი ტრეკი სახელწოდებით Sixteen, რომელიც 10G$-ს გამოცემულ ალბომშია შესრული.
აღსანიშნავია, რომ ლაივ კონცერტზე ძირითადი აქცენტი ქვეყანაში არსებულ პოლიტიკურ და სოციალურ მდგომარეობას შეეხო, რითაც არტისტმა სცენიდან გარკვეული მოწოდებებიც გააჟღერა, როგორიც არის „არა რუსულ კანონს“ და სხვა. Deena-მ Mtkvarze ჯერ არგამოქვეყნებული სიმღერა Ring Ring შეასრულა, რომელიც სწორედ ამ არსებულ სიტუაციას ეხმიანება.
„ახალი ტრეკები ჩემს დისკოგრაფიაში გამორჩეულია იმით, რომ ატარებს საპროტესტო გზავნილებს, ასევე პოლიტიკურად და სოციალურად აქტუალურ საკითხებს ეხმიანება. ჩემთვის ეს ძალიან მნიშვნელოვანია, რადგან, რაც ხდება ჩემს და ჩვენს გარშემო, ჩემთვის ძალიან დიდი პრობლემაა. ეს ძალიან მაწუხებს.“ – ამბობს Deena ბილბორდთან საუბარში.
ნახეთ არტისტ Deena-ს ვიდეო, რომელიც „ბილბორდ საქართველომ“ მოამზადა.
