ანდრეა ბოჩელის ინკლუზიური ჩართულობისთვის დაწესებული ჯილდო გადაეცემა. პრიზი, რომელსაც Ruderman-ის ოჯახის ფონდი გასცემს, იტალიელ ტენორს როგორც მისი მუსიკალური კარიერისთვის, ასევე საქველმოქმედო საქმიანობისთვის გადაეცემა. ანდრეა ბოჩელი ჯილდოს 2024 წლის საშობაო ტურნეს დროს, ბოსტონში ჩასვლისას მიიღებს.
„ეს არის ჩემი პირადი გზა, მუსიკალური კარიერა და საქველმოქმედო პროექტები. მე ყოველთვის ვანიჭებდი პრიორიტეტს მათ, ვისაც არ მიუწვდება ხმა ყველგან. მსურს დავუბრუნო სამყაროს ყველა სიკეთე, რათა საზოგადოების ამ წევრებმაც დაინახონ სამყაროს დადებითი მხარე და სილამაზე. ჩემთვის დიდი პატივია Ruderman-ის ფონდის ჯილდოს მიღება ორგანიზაციისგან, რომელიც როგორც სიტყვით, ასევე საქმით იზიარებს ჩემს მსოფლმხედველობას. ჩვენ ერთად გავაგრძელებთ მუშაობას უკეთესი სამყაროს ასაშენებლად“, – ნათქვამია ბოჩელის განცხადებაში.
ანდრეა ბოჩელის ფონდი ABF, ადგილობრივ პარტნიორ ფონდ St. Luc-თან ერთად, უკვე დაეხმარა ჰაიტიში რამდენიმე სკოლის აღდგენაში, რაც ყოველდღიურად 3,500-ზე მეტ მოსწავლეს განათლების მიღების საშუალებას აძლევს.
ანდრეა ბოჩელის ფონდმა 2011 წელიდან 70 მილიონი ევრო შეაგროვა, დააფინანსა 10 სკოლა ჰაიტისა და იტალიაში და 400 000-ზე მეტ ადამიანს გაუუმჯობესა საცხოვრებელი პირობები.
„როგორც მუსიკალურ კარიერაში, ასევე საქველმოქმედო საქმიანობაში, ანდრეა ბოჩელიმ დაამტკიცა, რომ შეუპოვრობით შეგვიძლია ყველაზე ამბიციურ მიზნებსა და ოცნებებს მივაღწიოთ“, – თქვა ჯეი რუდერმანმა, Ruderman-ის ფონდის პრეზიდენტმა.
Ruderman-ის ოჯახის ფონდი მეათე წელია მორტონ ე. რუდერმანის პატივსაცემად შეიქმნა. წარსულში ამ ჯილდოს მფლობელები გახდნენ ოსკაროსანი მსახიობი მარლი მატლინი, ყოფილი სენატორი ტომ ჰარკინი და კინო-მოღვაწეები პიტერ და ბობი ფარელები.
ჯილდოს მფლობელები არიან ასევე მსახიობი ევა ლონგორია, სელენა გომესი, NBA-ს ყველა ვარსკვლავის მატჩის ხუთგზის მონაწილე კევინ ლავი, ოსკარზე ნომინირებული მსახიობი ტარაჯი პ. ჰენსონი და ოლიმპიური ჩემპიონი მაიკლ ფელპსი.
მსოფლიოში ცნობილ ტენორ ანდრეა ბოჩელის ბილბორდ 200-ის ჩარტში ცხრა ტოპ-10 ალბომი აქვს, მათ შორის ალბომი Si, რომელმაც 2018 წლის ნოემბერში პირველი ადგილი დაიკავა.
ბილბორდ100-ში ანდრეა ბოჩელის ერთადერთი ჰიტია შესული, რომელიც 2010 წელს მერი ჯეი ბლაიჯთან თანამშრომლობით შეიქმნა. სიმღერა 1970 წლის კლასიკური ჰიტის, Bridge Over Troubled Water-ის ახლებური ვერსიაა.
მიუხედავად ხუთგზის ნომინანტობისა, ანდრეა ბოჩელის ჯერ გრემი არ მიუღია.
