2023 წელს Universal Pictures-ში მადონას ბიოგრაფიული ფილმის გადაღებები მუსიკოსის გლობალური ტურნეს, Celebration-ის გამო შეჩერდა.
პოპ-მუსიკის დედოფალმა ბიოგრაფიული ფილმის გამოსვლასთან დაკავშირებით შესაძლოა აზრი შეიცვალოს. 18 ნოემბერს მადონამ ინსტაგრამზე ბოლოდროინდელი სელფი ფოტოები გამოაქვეყნა და იმ სირთულეებზე ისაუბრა, რაც ფილმის გადაღების პროცესში შეემთხვა.
„რამდენიმე დღის განმავლობაში ლოს-ანჯელესში ვიყავი. ვუსმენდი პროდიუსერებს და აგენტებს, რომლებიც მიხსნიდნენ, თუ რატომ ვერ გადავიღებდი ჩემს ფილმს, რომელზეც ოთხი წლის განმავლობაში ვმუშაობდი. „შეამცირე, დააპატარავე, იფიქრე უფრო მცირე მასშტაბებზე“, – მეუბნებოდნენ ისინი და მივხვდი, რომ ჩემს ცხოვრებაში დიდი გამოწვევის წინაშე ვიდექი. ამ გამოცდილებამ და შემოქმედებით გუნდთან ურთიერთობამ საშუალება მომცა ჩარჩოებს მიღმა მეფიქრა. მე არ მქონია ნორმალური ცხოვრება. აქედან გამომდინარე, ვერ შევძლებ ამის ჩვეულებრივი გზით გაკეთებას.” – წერს მადონა.
„ჩვენ არ შეგვიძლია ჩვენი თავი შევზღუდოთ ან შევამციროთ, თუ ცხოვრებაში რაიმე ძალიან გსურთ, გჯეროდეთ, რომ მის მიღებაში მთელი სამყარო დაგეხმარებათ.” – ამატებს პოპის დედოფალი. პოსტის დასასრულს მადონა გულშემატკივრების აზრით ინტერესდება. „ჩემი ცხოვრების ისტორია სერიალად ვაქციო თუ სრულმეტრაჟიან ფილმად?“ კითხულობს მომღერალი, სადაც გულშემატკივრების დიდი ნაწილი მის აზრს იწონებს და სთავაზობს, მრავალეპიზოდიანი სერიალი გადაიღოს.
მადონას ბიოგრაფიული ფილმის გადაღება 2020 წელს დაანონსდა და საფუძვლად მას მუსიკოსის ცხოვრება და კარიერა უნდა დაედოს. გავრცელებული ინფორმაციით, მადონას როლის თამაში მსახიობ ჯულია გარნერს შესთავაზეს, თუმცა 2023 წელს ბიოგრაფიული ფილმის წარმოება Universal Pictures-ში მადონას გლობალური Celebration ტურნეს გამო შეჩერდა.
2024 წლის ივლისში ბიოგრაფიულ ფილმზე მუშაობა კვლავ განახლდა. მადონამ ივლისში ინსტაგრამზე ფოტოების სერია გამოაქვეყნა, სადაც ფილმის სცენარის წერის პროცესშია გადაღებული. სცენარი სათაურით Who’s That Girl, 1987 წლის ფილმსა და ამავე სახელწოდების სიმღერას ეხმიანება. მიუხედავად იმისა, რომ ტექსტი ბუნდოვანია, ჩანაწერებზე შენიშვნებია, რაც რედაქტირების პროცესზე მიგვანიშნებს.
