სამოქალაქო სარჩელში, რომელიც ნიუ-იორკის ფედერალურ სასამართლოში შევიდა, ჯეი-ზი და შონ კომბსი, იგივე Diddy, 2000 წელს 13 წლის გოგონას გაუპატიურებაში არიან დადანაშაულებულები. ჯეი-ზიმ ბრალდებას „შანტაჟის მცდელობა“ და „თაღლითი ადვოკატის“ მიერ შეტანილი უსაფუძვლო სარჩელი უწოდა.
სარჩელში ანონიმური პირი, მოხსენიებული როგორც ჯეინ დოუდი, აცხადებს, რომ კომბსმა და კარტერმა ის ნარკოტიკული ნივთიერებით გააბრუეს და სექსუალურად იძალადეს. მოსარჩელის მტკიცებით, ეს ფაქტი MTV-ს მუსიკალური ვიდეოების დაჯილდოების შემდგომ წვეულებაზე მოხდა. ეს საქმე წინა სარჩელის განახლებული ვერსიაა, რომელიც მხოლოდ კომბსს ეხებოდა.
სარჩელი შეიტანა ტონი ბუზბიმ, ტეხასელმა ადვოკატმა, რომელმაც ბოლო თვეების განმავლობაში კომბსის წინააღმდეგ არაერთი სარჩელი მოამზადა. ადვოკატი აცხადებს, რომ ის ათეულობით სავარაუდო მსხვერპლის ინტერესებს იცავს. დეკემბრის დასაწყისში ბუზბი ანონიმურმა პირმა შანტაჟში დაადანაშაულა. გაჟღერებული ბრალდების მიხედვით, ბუზბი „უსაფუძვლო ბრალდებების“ მუქარით კომბსისთვის ფულის გამოძალვას ცდილობდა.
კვირას საღამოს გაკეთებულ განცხადებაში ჯეი-ზიმ ბრალდებები კატეგორიულად უარყო და სარჩელს „შანტაჟის მცდელობა“ უწოდა. ბუზბის ის „თაღლით ადვოკატად“, „საშინელ ადამიანად“ მოიხსენია.
„თქვენ საშინელი შეცდომა დაუშვით, როცა იფიქრეთ, რომ ყველა ცნობილი ადამიანი ერთნაირია,“ – განაცხადა კარტერმა. „მე ბრუკლინის ერთ-ერთი უბნიდან ვარ და ჩვენ ასეთ თამაშებს არ ვთამაშობთ. ჩვენ ბავშვებს ვიცავთ, თქვენ კი ადამიანებს საკუთარი სარგებლისთვის იყენებთ. მხოლოდ შეთქმულების თეორიების მომხრეები დაიჯერებენ ამ უსაფუძვლო ბრალდებებს, რომლებიც, რომ არა ბავშვებზე ძალადობის სერიოზული ხასიათი, სასაცილოც კი იქნებოდა.“
„მოხარული ვარ გაჩვენოთ, რამდენად განსხვავებული ვარ,“ – აღნიშნა კარტერმა საპასუხო განცხადების ბოლოს.
კომბსი ბოლო წლის განმავლობაში არაერთხელ დაადანაშაულეს ძალადობაში. ეს სკანდალური საქმე თავდაპირველად სამოქალაქო სარჩელებით დაიწყო და შემდეგ ამას ფედერალური ბიუროს ბრალდებებიც მოჰყვა. სექტემბერში პროკურორებმა Diddy სექსუალურ ძალადობაში დაადანაშაულეს. პროკურორების მტკიცებით, კომბსის დანაშაულებრივ ქმედებებს სისტემური ხასიათი ჰქონდა და ისინი წლების განმავლობაში გრძელდებოდა.
სარჩელში ბუზბი ამბობს, რომ ჯეი-ზი კომბსის „დიდი ხნის მეგობარი და პარტნიორია“. ადვოკატი ამტკიცებს, რომ სავარაუდო მსხვერპლი წვეულებაზე მიიყვანეს და გაუთქმელობის ხელშეკრულებაზე ხელი მოაწერინეს. შემდეგ მას ნარკოტიკული საშულების შემცველი სასმელი მისცეს, რის შედეგადაც არასრულწლოვანი ცუდად გახდა. როგორც ბუზბი აცხადებს, მას შემდეგ, რაც გოგონა საძინებელში წავიდა, ორმა ცნობილმა ადამიანმა მასზე სექსუალურად იძალადა.
„კიდევ ერთი ცნობილი ადამიანი უყურებდა, როცა კომბსი და კარტერი მსხვერპლზე ძალადობდნენ,“- წერია სარჩელში. „წვეულებაზე ბევრი ადამიანი იმყოფებოდა, თუმცა ეს ძალადობა არავინ შეაჩერა.“
საპასუხო განცხადებაში ჯეი-ზიმ აღნიშნა, რომ „ამგვარი საშინელი“ ბრალდებები სისხლის სამართლის წესით უნდა განხილულიყო და არა სამოქალაქო სარჩელით. „თუ ვინმე ბავშვის წინააღმდეგ ასეთ დანაშაულს ჩაიდენს, ციხეში უნდა ჩაჯდეს, ხომ ასეა?,” – მიმართავს საზოგადოებას კარტერი. ასევე, კარტერმა განაცხადა, რომ ბუზბისთან არასდროს შეთანხმდება და მას საჯაროდ ამხელს.
„ერთადერთი, გული მტკივა ჩემი ოჯახის გამო,“ – განაცხადა კარტერმა. „ჩემმა მეუღლემ და მე შვილებს უნდა ავუხსნათ ეს ბრალდებები,” – განაცხადა ჯეი-ზიმ მის ირგვლივ მიმდინარე მოვლენების საპასუხოდ.
