„წინანდლის პრემიის“ განცხადებას ბილბორდ საქართველო უცვლელად გთავაზობთ:
„წინანდლის პრემიის“ საორგანიზაციო ჯგუფი შეშფოთებული ადევნებს თვალს ქვეყანაში განვითარებულ მოვლენებს და მხარს უჭერს საზოგადოებრიობის, განსაკუთრებით ახალგაზრდობის, ბრძოლას ევროპული მომავლის გადასარჩენად!
დარწმუნებული ვართ, საქართველო არ გადაუხვევს საუკუნეების წინ ჩვენი წინაპრების მიერ არჩეულ ევროინტეგრაციისკენ მიმავალ გზას და აუცილებლად გახდება ევროპული ოჯახის ღირსეული წევრი.
ევროპაში ინტეგრაცია შეესაბამება “წინანდლის პრემიის” მისიას − ხელი შეუწყოს სამოქალაქო საზოგადოების განვითარებას, მეცნიერებისა და განათლების ევროპული სტანდარტებისა და დემოკრატიული ღირებულებების დამკვიდრებას.
“წინანდლის პრემიის” მიზანი იყო და არის ჩვენი ქვეყნის წარმატებული ახალგაზრდა მეცნიერებისა და ხელოვანების მხარდაჭერა, რომლებიც ქმნიდნენ საქართველოს ხვალინდელ დღეს, “წინანდლის პრემიის” კონკურსანტებისა და ლაურეატების აბსოლუტური უმრავლესობა, რომლებიც დღეს უკვე თანამედროვე საქართველოს გამოჩენილი მეცნიერები და ხელოვანები არიან, დგანან ჩვენი სამშობლოს ევროპული მომავლის სადარაჯოზე.
“წინანდლის პრემიის” საორგანიზაციო ჯგუფი გმობს სამართალდამცავი ორგანოების მხრიდან ძალადობას, აგრესიის ნებისმიერ გამოვლინებას მშვიდობიანი დემონსტრანტების წინააღმდეგ, რომლებიც სწორედ ევროპული ღირებულებების, ადამიანის ძირითადი უფლებებისა და თავისუფლებების, კანონის უზენაესობის დასამკვიდრებლად იბრძვიან.
“წინანდლის პრემიის” საორგანიზაციო ჯგუფმა დაასრულა მიმდინარე წლის პროექტი და ექსპერტების მიერ გამოვლინდნენ ლაურეატები, მაგრამ შექმნილი ვითარებიდან გამომდინარე, 12 დეკემბერს არ გავმართავთ ლაურეატების დაჯილდოების საზეიმო ცერემონიას!”
„წინანდლის პრემია“ თანამედროვე ხელოვნებასა და მეცნიერებაში არსებულ მიღწევათა პოპულარიზაციას ემსახურება და ხელს უწყობს ახალგაზრდა, ნიჭიერ და პერსპექტიულ შემოქმედთა შესაძლებლობების რეალიზებას.
