უკვე ორ ათწლეულზე მეტია, რაც ლიტერატურული პრემია „საბა“ ყოველწლიურად თანამედროვე ქართულ ლიტერატურულ პროცესს აჯამებს და წლის გამარჯვებულებს ავლენს. თუმცა, წელს საქართველოში მიმდინარე საპროტესტო აქციებისა და პოლიტიკური თუ საზოგადოებრივი პროცესების გამო, „საბას” წლის 22-ე საზეიმო დაჯილდოების ცერემონია არ გამართულა.
აღსანიშნავია, რომ წელს „საბას” საუკეთესო ლიტერატურულ დებიუტად მუსიკოსისა და მწერლის, აინე მერმეს, იგივე ნატუკა ნაცვლიშვილის წიგნი, „ეუარა” დასახელდა.
აინე მერმე – ნატუკა ნაცვლიშვილი:
„ეუარას“ რამდენიმე წლის განმავლობაში ვწერდი, მაგრამ, ალბათ, ყველაზე მნიშვნელოვანი ეტაპი ქუთაისში მარტო გადასვლის გადაწყვეტილება იყო, სადაც ექვსი თვის მანძილზე ვმუშაობდი ამ ტექსტის საბოლოო ვერსიაზე. ამ მარტოობაში და რუტინაში გამოიწრთო საბოლოოდ ეს ტექსტი. გამარჯვებას კი არა, წიგნის გამოცემასაც არ ვგეგმავდი, რადგან საკმაოდ თავისებური საკითხავია. თაროზე მედებოდა, რომ არა ნინო ლომაძე, რომელმაც შემთხვევით გაიგო ამ ტექსტის არსებობა და წაკითხვიდან ერთ კვირაში ბეჭდვაში ჩაუშვა. მისი ეს გადაწყვეტილება ჩემთვის დღემდე ძალიან მნიშვნელოვანია.
ამ ლიტერატურული პრემიის აღებასაც, რომ არ მოგატყუოთ, არ ველოდი, თუმცა, ამ რთულ ვითარებაში ძალიან მახარებს ეს ფაქტი. მიმდინარე ბრძოლის ფონზე მერიდება კიდეც მოლოცვების მიღება, მაგრამ, თან ვფიქრობ, რომ ესეც იმ საერთო საქმის ნაწილია, რასაც ყველა ერთად ვაკეთებთ, ქუჩასა თუ სახლში. გამარჯვებები და მიღწევები ორივეგან საჭიროა, მეტი ძალა გვეძლევა ინდივიდუალურად და შემდეგ შეგვიძლია, ეს ძალა საერთო მუხტისთვის გამოვიყენოთ.”
ლიტერატურული პრემია „საბა“ 2024-ის ჟიურის წევრები იყვნენ: პროზაიკოსი ბიძინა მაყაშვილი; პოეტი პაატა შამუგია; მთარგმნელი თამარ ჯაფარიძე; ლიტერატორი გვანცა ჩხენკელი და პოეტი ლია ლიქოკელი.
ნახეთ 2024 წლის პრემია „საბას“ გამარჯვებულთა სრული სია:
