ადამიანი∞სამყარო (დაჩი ხასაია) მსმენელს ახალ, რიგით მეხუთე ალბომს უზიარებს. პროექტი, სახელწოდებით „სად”, ორი წლის განმავლობაში იქმნებოდა და როგორც ავტორი სოციალურ ქსელში წერს, ის „ეძღვნება თვითგამორკვევის მცდელობებს და საქართველოს ევროპულ მომავალს.” ალბომი ყველა სტრიმინგ პლატფორმაზეა ხელმისაწვდომი.
დაჩი ხასაია:
„უკვე დიდი ხანია, ევროკავშირში ვცხოვრობ, წელს ბელგიის მოქალაქეც გავხდი, შესაბამისად, მხარს ვუჭერ და ვიცი, თუ როგორ წაადგება ეს კავშირი ჩვენს ქვეყანას და პირიქით, ჩვენი სილამაზე და ნიჭი – ევროკავშირს. ეს ალბომიც ჩვენი თვითგამორკვევის მცდელობებსა და იმ მოქმედებას ეძღვნება, რომელიც სასურველ შედეგამდე მიგვიყვანს.
2 წლის განმავლობაში, როცა ამ ალბომს ვქმნიდი, ჩემში დომინირებდა კითხვა, თუ სად ვართ ჩვენ და ეს ემოცია ამ პროექტშიც აისახა. ალბომი შეიძლება ჩაითვალოს ჩემი სივრცისა და ადგილის ფუნდამენტური ბუნების კვლევად, რომელზე პასუხებიც გარკვეული დოზით ვიპოვე, მაგრამ ეს არ არის საკმარისი იმისთვის, რომ გადაჭრით ვთქვა, თუ სად ვართ… კითხვა და სიტყვა „სად” ჩვენი ცნობიერების გამოცდილების ადგილია, ის სიმბოლურ ხასიათს ატარებს, სადაც ადგილმდებარეობა ვერ ფიქსირდება. ჩემი ალბომიც დაჟინებით მოითხოვს ამ კითხვაზე პასუხს, თუმცა, ამ შემართების მიუხედავად, მას ვერ პოულობს. უფრო დიდ განზომილებაში კი ვხედავთ, რომ ჩვენი ქვეყნის შემთხვევაშიც ასეა. ისიც ისევე ეძებს პასუხს ამ კითხვაზე, როგორც ჩვენ… ასე რომ, ვფიქრობ, ახალი ალბომისთვის სახელი მართლაც ზუსტად შევარჩიე, რადგან მეც და ჩემს სამშობლოსაც ახლა ერთი და იგივე გამოწვევა გვიდგას. ამ კითხვის მიახლოებითი პასუხი კი ჩემთვის მოქმედებაა. მინდა, ყველას დიდი მადლობა გადავუხადო ქვეყნის გვერდში დგომისთვის, რადგან დღეს ქვეყნის მომავლისთვის მორიგი გადამწყვეტი მომენტია, როცა ყველა კეთილდღეობას ირჩევს. კეთილდღეობა კი მხოლოდ ჩვენს ევროპულ სახლშია.
ალბომის მუსიკალურ მხარეს რაც შეეხება, ის, ტრადიციულად, ჩემს საყვარელ Lo-Fi ჟანრშია გადაწყვეტილი, სადაც გაერთიანებულია რამდენიმე მუსიკალური სტილის სიმღერა. სიახლეა ის, რომ პირველად გავრეპე, რაც მსმენელისთვის სიურპრიზი იქნება.”
მოუსმინეთ ადამიანი∞სამყაროს ახალ ალბომს „სად”:
