ლედი გაგასთვის 2025 წელი წარმატებულად დაიწყო. მისი და ბრუნო მარსის დუეტი Die With a Smile ამ კვირის Billboard Hot 100-ის პირველ ადგილზე გავიდა, რისთვისაც მომღერალმა ტიკტოკზე ფანებს მადლობა გადაუხადა.
გაგამ ვიდეო გაავრცელა, რომელშიც ამბობს: „ძალიან მადლიერი ვარ, რომ ჩემი სიმღერა Die With a Smile, ჩემს მეგობარ ბრუნო მარსთან ერთად, Hot 100-ის პირველ ადგილზეა. არ მჯერა, რომ იმ სამი ათწლეულის განმავლობაში, რაც მუსიკას ვქმნი, თითოეულ დეკადაში Hot 100-ის ორი ლიდერი სიმღერა მაქვს. მადლობა, რომ მისმენთ, ცეკვავთ და თქვენს ხელოვნებას ჩემი ხელოვნების გვერდით ქმნით.”
Die With a Smile ლედი გაგამ და ბრუნო მარსმა 2024 წლის 16 აგვისტოს გამოსცეს. სიმღერა მალევე გახდა Billboard Global 200-ის ლიდერი, სადაც რვა კვირა გაატარა.
ახლა კი, ამ მიღწევით, ლედი გაგას Hot 100-ის ლიდერი სიმღერების რაოდენობამ უკვე ექვსს მიაღწია. როგორც ვიდეოში თავად აღნიშნა, მას ახლა უკვე ჩარტის ორ-ორი ლიდერი სიმღერა აქვს სამ სხვადასხვა დეკადაში – 2000-იანებში, 2010-იანებსა და 2020-იანებში. ეს შედეგი აქამდე მხოლოდ ჯენეტ ჯექსონსა და მაიკლ ჯექსონს ჰქონდათ.
მომღერლის შემდეგი ნაბიჯი მისი რიგით მეშვიდე ალბომი უნდა იყოს, რომელშიც Die With a Smile შევა. ალბომის გამოსვლას, რომლის მთავარი სინგლიც ოქტომბერში გამოცემული Disease იქნება, თებერვალში ელოდებიან.
„ძალიან მიხარია, რომ ეს სიმღერა ჩემს ახალ ალბომშია,” – ამბობს გაგა ვიდეოში. „და ასევე მიხარია, რომ მალე გაიგებთ, თუ რა მაქვს კიდევ თქვენთვის მარაგში.”
გამომწერებს მადლობა გაგამ ინსტაგრამზეც გადაუხადა, სადაც მომღერალმა სელფი გამოაქვეყნა და დაწერა: „მადლობა, რომ Die With A Smile Hot 100-ის პირველ ადგილზე აიყვანეთ! გვიყვარხართ და მადლიერები ვართ თქვენი. სიურრეალურია ის, რომ სამი ათწლეულის განმავლობაში ჩარტის რამდენიმე ლიდერი სიმღერა მაქვს. სავსე ვარ თქვენი სიყვარულითა და მხარდაჭერით, რომელსაც დასაწყისიდანვე მაგრძნობინებთ,” – წერს მომღერალი.
ნახეთ ლედი გაგას ვიდეო:
@ladygaga Thank you for making me #1 ♬ Die With A Smile – Lady Gaga & Bruno Mars
