როგორც აღმოჩნდა, ფარელ უილიამსს კიდევ ერთი ბიოგრაფიული ფილმი ჰქონდა დაგეგმილი. გასული წლის ე.წ. ლეგო-ფილმის – Piece by Piece-ის შემდეგ, ფარელმა Universal-თან ერთად დაიწყო მუშაობა ბიოგრაფიულ მიუზიკლზე, სახელწოდებით Golden.
თავდაპირველად, ფილმის პროექტი Atlantis-ის სახელით იყო ცნობილი და მას Eternal Sunshine of the Spotless Mind-ის რეჟისორი მიშელ გონდრი იღებდა. უილიამსმა და გონდრიმ ფილმი პოსტ-პროდუქციის ეტაპზე გააუქმეს, რადგან საბოლოო შედეგმა მათი მოლოდინები ვერ გაამართლა.
„როდესაც მონტაჟის ოთახში შევიკრიბეთ, გადავწყვიტეთ, რომ ეს ფილმი ვერ გადმოსცემდა ისტორიის იმ ვერსიას, რომელსაც თავდაპირველად მოვიაზრებდით,“ – განაცხადეს უილიამსმა და გონდრიმ Variety-სთან ერთობლივად გაკეთებულ განცხადებაში, რომელიც გამოცემა
Billboard-საც გადაეგზავნა. „ვაფასებთ ნიჭიერი მსახიობებისა და გადამღები ჯგუფის შრომას. ვწუხვართ, რომ ამ ფილმს ვერ შემოგთავაზებთ, თუმცა Universal-ში ჩვენ შესანიშნავი პარტნიორები გვყავს და მალე სხვა ფორმატში ისევ ვითანამშრომლებთ.“
ფარელმა გასულ ნოემბერს, ჟურნალ Empire-თან ლეგო-ფილმისა და მხატვრული მიუზიკლის განსხვავებაზე ისაუბრა. „Piece by Piece ჩემი ცხოვრების შესახებ არის, მაშინ როდესაც Golden იმ უბანზე გვიყვება, სადაც გავიზარდე. ეს სრულიად განსხვავებული პროექტია. ეს არის მუსიკალური მოგზაურობა, რომელიც 1977 წლის ზაფხულში, ვირჯინია ბიჩზე ვითარდება და იმ ეპოქის მუსიკალური სულით არის გაჟღენთილი. როგორც Dirty Dancing-სა და Grease-ში არის მუსიკა ერთგვარი პერსონაჟი, ასეა ამ ფილმშიც. ეს თვითგამორკვევის და ოცნებებისკენ სვლის ისტორიაა, მაგრამ ბევრად უფრო ჯადოსნური. ეს შავკანიანთა კულტურის, შავკანიანთა ცხოვრების და რაც მთავარია, მათი სიხარულის ზეიმია,” – აღნიშნა ფარელ უილიამსმა.
Variety-ის ინფორმაციით, Golden-ის გამოსვლა 5 მაისს იყო დაგეგმილი. ამ დროისათვის, კინოკომპანია Universal-ის მიერ პროექტზე დახარჯული თანხა 20 მილიონ დოლარს აღწევს.
რაც შეეხება ფარელის მუსიკალურ კარიერას, ის ძველ მეგობართან და შემოქმედებით პარტნიორთან, Clipse-თან გაერთიანდა. მათი ხმაურიანად დაანონსებული ალბომი – Let God Sort Em Out, გეგმის მიხედვით, წელს უნდა გამოვიდეს.
