როგორც ჩანს, დრეიკმა თავის კოლექციას ფარელ უილიამსის კუთვნილი კიდევ ერთი ძვირფასი გულსაკიდი შემატა. რეპერმა ცოტა ხნის წინ სოციალურ ქსელში გააზიარა ფოტო, რომელშიც ჩანს უილიამსის მუსიკალური პროექტის, N.E.R.D.-ის სიმბოლიკით შექმნილი ჯაჭვი. ეს სამკაული ადრე Kid Cudi-ს ეკუთვნოდა. ჯაჭვი Jacob & Co.-ს მიერ არის შექმნილი. თეთრი და ვარდისფერი 14-კარატიანი ოქროთი დამზადებული ნაკეთობა ბრილიანტებით არის გაფორმებული. ის 2005 წელს თავად ფარელის შეკვეთით შეიქმნა და მისი ბენდის, N.E.R.D.-ის დაფუძნებას მიეძღვნა.
თავდაპირველად ჯაჭვი Kid Cudi-მ შეიძინა ფარელის პირველ პირად აუქციონზე, სახელწოდებით – Son of a Pharaoh. აუქციონი 2022 წელს თავად ფარელ უილიამსის პლატფორმა Joopiter-ზე გაიმართა. გულსაკიდის ფასი მაშინ 720 000 დოლარი იყო. მოგვიანებით ეს ჯაჭვი Kid Cudi-მ თავადაც პირად აუქციონზე გამოიტანა. გამოცემა Complex-ის ცნობით, ის 243 000 დოლარად გაიყიდა. ნაკეთობის საწყისი შეფასება 80 000-დან 120 000 დოლარამდე მერყეობდა.
Joopiter-ის ამ აუქციონში მონაწილეობდა დრეიკიც. მან ექვსი სხვადასხვა ნივთი შეიძინა და ჯამში თითქმის 3 მილიონი დოლარი გადაიხადა. შემდეგ, 2023 წელს, თავის მუსიკალურ ვიდეოში – Jumbotron Sh—t Poppin ამ ნაკეთობებით გამოჩნდა. მოგვიანებით სამკაულები ახსენა ტრევის სკოტის სიმღერა Meltdown-შიც, როცა თავის ორ მთავარ მოწინააღმდეგეს, Pusha T-სა და ფარელს აკრიტიკებდა. იგივე სამკაულები დრეიკმა კიდევ ერთხელ გამოაჩინა ვიდეოში – Family Matters.
როგორც ირკვევა, ფარელ უილიამსი ამ ყველაფრის მიმართ გულგრილია. მან GQ-სთან ინტერვიუში აღნიშნა, რომ ეს თავდასხმები საერთოდ არ აწუხებს.
