მომღერალმა SZA-მ მაკიაჟის ხაზი, სახელწოდებით Not Beauty გამოუშვა. პროდუქტები ექსკლუზიურად შეერთებული შტატების მასშტაბით, მხოლოდ ე.წ. pop-up მაღაზიებში იქნება წარმოდგენილი. Not Beauty კენდრიკ ლამარის და SZA-ს ერთობლივი ტურნეს, Grand National Tour-ის ფარგლებში, მიმდინარე კვირიდან გაიყიდება.
მაკიაჟის ხაზის პირველი პროდუქტი ტუჩის მბზინავი ბალმი, ე.წ. ტუჩის გლოსია, რომელიც წარმოდგენილია სამ ფერში: The Flesh, Strawberry Jelly და Quartz. თითოეულის ღირებულება $23 იქნება. მომავალში Not Beauty-ს ხაზს დაემატება ტუჩის ტონერები, კონტურის ფანქრები და ტუჩის კრემები. როგორც SZA-მ Vogue-თან ინტერვიუში თქვა, Super Bowl-ის მუსიკალურ შოუზე კენდრიკ ლამართან ერთად გამოსვლისას, როცა მათ ჰიტები All the Stars და Luther შეასრულეს, სწორედ თავისი ბრენდის ტუჩის ბალზამი ესვა.
როგორც პრესრელიზში ვკითხულობთ, შეფუთვის დიზაინი შთაგონებულია ბუნებით – ხის ტექსტურებით, მცენარეებით, მწერებითა და თამამი, ბუნებრივი ფერებით. სწორედ ეს იყო SZA-ს ცნობილი ალბომის, SOS-ის ლუქს ვერსიის გარეკანის ინსპირაციაც. Not Beauty სრულად ვეგანური, გლუტენისა და ცხოველებზე ტესტირების გარეშე შექმნილი პროდუქტია.
„Not Beauty არის მცდელობა, შევაბიჯო სილამაზის ინდუსტრიაში. ეს არის პასუხი საჭიროებაზე – მჭირდებოდა რაღაც, რაც გაძლებდა ჩემი შოუს, საუბრის ან პაემნის ბოლომდე,“ – ამბობს გრემის მფლობელი არტისტი. „ვერ ვიტყვი, რომ ბევრ რამეში ვერკვევი კარგად, მაგრამ ტუჩებზე ნამდვილად ბევრი ვიცი. მგონია, რომ Not Beauty არ არის უბრალოდ სილამაზე – ეს არის ის, რაც მე გამომადგა და მინდა, თქვენც გაგიზიაროთ. ეს მართლა ხარისხიანია. საოცარია.“
სილამაზის ინდუსტრიაში SZA-ს პირველი ნაბიჯი არ არის ერთადერთი დებიუტი მის კარიერაში – წელს მან ბედი კინოინდუსტრიაშიც სცადა. არტისტმა ახალი როლი მოირგო და მონაწილეობა მიიღო ფილმში One of Them Days, სადაც კიკი პალმერს უწევს სამსახიობო პარტნიორობას.
