ამერიკელი მსახიობი ნიკოლას ქეიჯი ამბობს, რომ თუ ის და ავსტრალიელი მუსიკოსი ნიკ ქეივი ერთ ოთახში აღმოჩნდებიან, ვერავინ გაარჩევს, ვინ ვინ არის.
2024 წელს ქეიჯის მონაწილეობით ფილმი The Surfer გამოვიდა, რომელიც ავსტრალიაშია გადაღებული. The Guardian-თან საუბარში ნიკ ქეიჯი ნიკ ქეივთან დაკავშირებულ ისტორიებს იხსენებს:. „არ არსებობს დღე, რომ ვინმეს ნიკ ქეივში არ ავერიო. როცა მას შევხვდი, ძალიან კეთილგანწყობილი იყო. მახსოვს, ცხოველთა თავშესაფარში ვიყავით, მგონი, ტეხასში – Sealy Animal Hospital-ში. შესანიშნავი ადგილი იყო. მივედი, მივესალმე, ხელი ჩამოვართვი და ვუთხარი: მხოლოდ ერთი ასო გვაშორებს ერთმანეთისგან.”
გვარის გამო შექმნილ კომიკურ სიტუაციებზე წარსულში თავად ნიკ ქეივმაც გააზიარა ისტორიები: „ხალხს ხშირად ვეშლები ნიკოლას ქეიჯში. მაგალითად, როცა საზღვარს ვკვეთ, ოფიცერი პასპორტს შეხედავს და მეუბნება: სასიამოვნოა თქვენთან შეხვედრა, მისტერ ქეიჯ. დიდებული იყავით Face/Off-ში, ან რამე მსგავსი. ზოგჯერ ეს ნერვებზე მოქმედებს, მაგრამ შემდეგ ეჩვევი”.
ქეივმა ერთი განსაკუთრებული ისტორიაც გაიხსენა – როგორ აერიათ ქეიჯში ჰილსვილის ნაკრძალის სუვენირების მაღაზიაში, როცა გარდაცვლილ შვილს, არტურს საჩუქრად დიჯერიდუს ყიდულობდა. ქეივის თქმით, შემდეგ, მელბურნში დაბრუნებისას, ადგილობრივ პაბშიც შეხვდა ქეიჯს: „უსაფრთხოების თანამშრომელს კერძო ოთახში შევყავარ. ბართან ნიკოლას ქეიჯი ზის. თავსაფარი ახურავს და ხელში დიჯერიდუ უჭირავს. ქეიჯი ყვირის: მხოლოდ ერთი ასო გვაშორებს! სკამიდან ხტება და ხელის ჩამორთმევას ცდილობს. ცოტა დაბნეული ვარ, მაგრამ ვეუბნები: ჩემთვის პატივია თქვენი გაცნობა, მისტერ ქეიჯ. თქვენც ჰილსვილის ნაკრძალში იყავით? ის მიყვირის: დიახ! და მე ვეუბნები: ჰოდა, მეც!’“
მართლა ეშლება თუ არა ხალხს ერთმანეთში ნიკ ქეივი და ნიკოლას ქეიჯი და რამდენად შეესაბამება სიმართლეს ქეივის მონათხრობი, ეს დღემდე ბუნდოვანია.
ინტერვიუში ნიკოლას ქეიჯმა ისიც აღნიშნა, რომ მოსწონს ავსტრალიური ბენდი Nicolas Cage Fighter. ,,მართლაც შესანიშნავი მუსიკა აქვთ. მათი სიმღერები გაძლევენ მოტივაციას. ტექსტები გიბიძგებს, საკუთარ შეცდომებზე აიღო პასუხისმგებლობა, თავი დააღწიო მსხვერპლის როლს და მოძებნო პრობლემების გადაჭრის გზა.“
