10 მაისს CMR-ში აუდიტორიის წინაშე Tbilisi Newcomers 2025-ის ფინალში გასული შემსრულებლები წარდგნენ, გამარჯვებული კი მეტალ ბენდი Sif გახდა. ჯგუფი წელს თბილისის ერთ-ერთ ყველაზე მასშტაბურ მუსიკალურ ფესტივალზე, Tbilisi Open Air-ის სცენაზე გამოვა.
Tbilisi Newcomers უკვე წლებია, ქართული მუსიკალური სცენის გაძლიერებასა და ახალი ტალანტების აღმოჩენას ისახავს მიზნად. პროექტი ახალგაზრდა მუსიკოსებს შესაძლებლობას აძლევს, საკუთარი შემოქმედება ფართო აუდიტორიას გააცნონ. გამარჯვებული კი ტრადიციულად, Tbilisi Open Air-ის სცენაზე წარდგება, რაც ბენდისთვის ახალი გზის დასაწყისია.
10 მაისს Newcomers 2025-ზე 11 ფინალისტი წარდგა: Sif, Lilluash, The Cave, Pig Kelekh, Stone Cult, Kohre, Funky Ar Minda, See Me, Chveneba, Autocut და Stutter.
ღონისძიებაზე დამსწრე საზოგადოებას შესაძლებლობა ჰქონდა, სხვადასხვა ჟანრის ცოცხალი მუსიკა მოესმინა. ჟიურისა და მაყურებლის განსაკუთრებული მოწონება კი Sif-ის გამოსვლამ დაიმსახურა, რომლის ენერგიულმა შესრულებამ და გამორჩეულმა ჟღერადობამ ბენდს გამარჯვება მოუტანა.
Tbilisi Open Air წელს სპეციალური გამოშვებით 24-25 მაისს, ჩვეულ ადგილას, Lisi Wonderland-ის სივრცეში ბრუნდება. მუსიკალური ფორმატის გარდა, ღონისძიებაში მონაწილეობას მიიღებენ ქართული თეატრი, ნაციონალური ბალეტი, ქართული მუსიკალური ლეიბლები, ბუნებრივი ღვინის ფესტივალი და თბილისის წიგნის ბაზრობა.
“აღსანიშნავია, რომ Tbilisi Open Air ყოველთვის იყო თავისუფლების, თანასწორობისა და სოლიდარობის სიმბოლო. წლევანდელ ღონისძიებას კი კიდევ ერთი მნიშვნელოვანი მისია დაემატება – გაყიდული ბილეთებიდან შემოსული თანხის ნაწილი თანამედროვე ხელოვნების და კულტურის ფონდსა და საქართველოს მუსიკოსთა პროფესიულ კავშირში გადაირიცხება.” – წერია ფესტივალის მიერ გავრცელებულ განცხადებაში.
