30 მაისს პოპ-სუპერვარსკვლავი ედისონ რეი The New York Times-ის Popcast-ს სტუმრობდა. არტისტმა ლუიზიანას სახელმწიფო უნივერსიტეტში გატარებული პერიოდი გაიხსენა, როდესაც ლეიბლები PayPal-ის საშუალებით მას მხოლოდ 20 დოლარს უხდიდნენ იმისთვის, რომ TikTok-ზე მათი არტისტების სიმღერებზე ცეკვის ვიდეოები გამოექვეყნებინა.
„მახსოვს, კოლეჯის პერიოდში მცირე შეთავაზებები მქონდა ლეიბლებისგან, ფულს მიხდიდნენ, რომ პოსტები დამედო. ვფიქრობდი, საინტერესო იყო ის, რომ მუსიკალური ინდუსტრია ასე აქტიურად ეყრდნობოდა ამას.“ – თქვა ედისონ რეიმ.
როგორც ჩანს ეს 2019 წელს ხდებოდა, როდესაც TikTok-ის პლატფორმა აღმასვლას იწყებდა. Popcast-ის თანაწამყვანმა ჯონ კარამანიკამ შესაძლო ჰონორარად რამდენიმე ასეული დოლარი დაასახელა, თუმცა, როგორც რეიმ განმარტა, სინამდვილეში მისი ჰონორარი ბევრად ნაკლები იყო: „ასი დოლარი? ნეტავ მართლა ასე ყოფილიყო, 20 დოლარი იყო, ზუსტად მახსოვს. ვფიქრობდი: ღმერთო ჩემო, 20 დოლარი.”
ედისონ რეიმ დაადასტურა, რომ ანაზღაურება PayPal-ის საშუალებით ერიცხებოდა.
ედისონ რეი ერთ-ერთი პირველია, ვინც TikTok-პლატფორმიდან შემოქმედებითი გზა გაიკვალა, პოპულარობა მოიპოვა და ახლა ცდილობს, კიდევ უფრო დიდ წარმატებას მიაღწიოს. არტისტი პარასკევს Columbia Records-ის მეშვეობით თავის პირველ, სადებიუტო ალბომს Addison Rae-ს გამოსცემს.
ალბომში თორმეტი სიმღერაა გაერთიანებული, რომელშიც აქამდე გამოცემული სინგლები, მათ შორის Billboard Hot 100-ის ჰიტი Diet Pepsi, ასევე Aquamarine, Headphones On, High Fashion და Fame is a Gun შედის.
ნახეთ სრული ინტერვიუ Popcast-ის ეპიზოდში:
