ბერკლის მუსიკის კოლეჯის პროფესორი და Yamaha-ს ჯაზარტისტი გიორგი მიქაძე 4 ივლისს ARTERIA-ში კონცერტს გამართავს. საღამოში, სახელწოდებით Giorgi Mikadze & Friends, ასევე მონაწილეობას მიიღებენ სტეფანე და თამადა.
პროგრამა მოიცავს თანამედროვე საავტორო კომპოზიციებს – ექსპერიმენტულ ჟღერადობას ჯაზის, ფანკის, პოპისა და ელექტროაკუსტიკური ელემენტებით, რომლებიც ქართულ ფოლკლორულ მოტივებთანაა შერწყმული. მუსიკოსის თქმით, საღამო გამორჩეული იქნება ჟანრობრივი მრავალფეროვნებით. სოლისტებთან ერთად სცენაზე იდგება ბენდიც: ლევან დეისაძე (ბასი), გიგი ცინცაძე (ელექტრო გიტარა), ზაზა ცერცვაძე (დასარტყამი საკრავები) და კახა ჯაგაშვილი (საქსოფონი).
კონცერტი წინ უსწრებს გიორგი მიქაძის საერთაშორისო ტურნეს, რომელსაც ქართველი მუსიკოსი გრემის მფლობელ და 19-ჯერ ნომინირებულ ლეგენდარულ გიტარისტ ლი რიტენურთან ერთად გამართავს. ტურნეს ფარგლებში მუსიკოსები ისეთ სცენებზე დაუკრავენ, როგორებიცაა North Sea Jazz Festival (ნიდერლანდები), Umbria Jazz (იტალია), Copenhagen Jazz Festival (დანია) ლონდონის ისტორიული ჯაზ-კლუბი Ronnie Scott’s, მანჩესტერის ერთ-ერთი უმნიშვნელოვანესი მუსიკალური სცენა Band on the Wall და სხვა.
ბილეთები შეიძინეთ ბმულზე.
