Michael – ასე ჰქვია Lionsgate-ისა და Universal Pictures-ის ერთობლივ ბიოგრაფიულ ფილმს, რომლის რეჟისორიც ანტუან ფუკუაა. ფილმს მაყურებლები დაანონსების დღიდან ელიან და ახლა ცნობილი ხდება, რომ ნამუშევარი ეკრანებზე 2026 წლის 24 აპრილს გამოვა. თავდაპირველად მისი პრემიერა 2025 წლის ოქტომბერში იგეგმებოდა.
გადაწყვეტილება, რომელიც პირველად გამოცემა Deadline-მა გაავრცელა, მას შემდეგ მიიღეს, რაც ფილმის ძირითადი გადაღებები 2024 წლის მაისში დასრულდა. თუმცა მასშტაბურმა დამატებითმა სცენებმა და მონტაჟის პირველმა ეტაპმა პოსტპროდუქციის პროცესის გახანგრძლივება გამოიწვია. სტუდიის ხელმძღვანელები მანამდეც ვარაუდობდნენ შესაძლო გადადებას და ფილმის ორ ნაწილად გაყოფაზეც ფიქრობდნენ. აღსანიშნავია, რომ ნამუშევარი საკმაოდ მოცულობითია და მისი ბიუჯეტი 155 მილიონ დოლარს შეადგენს.
ჯონ ლოგანის სცენარი მაიკლ ჯექსონის ცხოვრების საკვანძო ეპიზოდებს ეხება – დაწყებული ბავშვობით, როცა ჯო და კეტრინ ჯექსონები მას მკაცრად ზრდიდნენ, დასრულებული მუსიკალური მსოფლიო რეკორდებით. მთავარ როლს თავად მაიკლ ჯექსონის ძმისშვილი – ჯააფარ ჯექსონი ასრულებს.
პროექტში ჩართულია ოსკაროსანი პროდიუსერი გრეჰემ კინგი. სწორედ ის ხელმძღვანელობს გუნდს, რომელმაც ჯექსონის ყველაზე ლეგენდარული სიმღერების გამოყენების უფლება მოიპოვა. წყაროების მიხედვით, ამ შეთანხმებებს კომპლექსური მოლაპარაკებები უძღოდა წინ, როგორც ჯექსონის მემკვიდრეობით ფონდთან, ისე რამდენიმე მუსიკალურ გამომცემელთან.
„ჩემთვის დიდი პატივია მაიკლ ჯექსონის ამბის მოყოლა. ეს დიდი გზაა, რომელიც ახლა სრულდება და ამ ფილმით მაყურებელი მაიკლს სრულიად ახალი პერსპექტივით დაინახავს,“ – განაცხადა გრეჰემ კინგმა.
Lionsgate-ის კინოჯგუფის ხელმძღვანელმა ადამ ფოგელსონმა კი დაამატა: „მაიკლ ჯექსონი ერთ-ერთი უდიდესი შემსრულებელია მუსიკის ისტორიაში. მისი გავლენა მუსიკაზე, ვიზუალურ ხელოვნებაზე, მოდასა და კულტურაზე დღემდე ძლიერად იგრძნობა.”
ფილმის საერთაშორისო დისტრიბუციას Universal უზრუნველყოფს (იაპონიის გარდა, სადაც გავრცელების უფლება Kino Films-ს აქვს), ხოლო აშშ-ში ამ მიმართულებას Lionsgate უხელმძღვანელებს. პრემიერის მოახლოებასთან ერთად დაიწყება პრომოკამპანია, რომლის ფარგლებშიც ეტაპობრივად გავრცელდება კულისებს მიღმა გადაღებული მასალა: ჯააფარ ჯექსონის გარდაქმნის პროცესის ამსახველი ვიდეოები, საარქივო ჩანაწერების ფრაგმენტების ინტეგრირების პროცესი და ჯექსონის ლეგენდარული გამოსვლების რეკონსტრუქციები.
