ავსტრიის ცნობილ საოპერო ფესტივალზე Oper im Steinbruch St. Margarethen გიორგი გაგნიძის დებიუტი შედგა. ქართველი ბარიტონი ვაგნერის ცნობილ ოპერაში „მფრინავი ჰოლანდიელი” მთავარ როლს ასრულებს. წარმოდგენის რეჟისორია ფილიპ კრენი, დირიჟორი – პატრიკ ლანგი.
„მფრინავი ჰოლანდიელის” პრემიერა 9 ივლისს შედგა და ავსტრიის საზოგადოებრივი მაუწყებლის არხის, ORF III-ის პირდაპირი ეთერით გადაიცა. ფესტივალის ფარგლებში ივლისში უკვე გაიმართა ოთხი წარმოდგენა. საოპერო დადგმის მომდევნო თარიღებია: 31 ივლისი; 8, 15 და 23 აგვისტო.
აღსანიშნავია, რომ მფრინავი ჰოლანდიელის როლი გიორგი გაგნიძემ პირველად 2005 წელს შეასრულა. 20-წლიანი პაუზის შემდეგ კი ქართველი ბარიტონი აღნიშნულ პარტიას ევროპის ერთ-ერთ ყველაზე პრესტიჟულ ღია სცენაზე დაუბრუნდა.
„ამ საოცარი როლის შესრულება დებიუტიდან 20 წლის შემდეგ ჩემთვის ნამდვილი ჯილდოა,” – წერს გიორგი გაგნიძე.
ქართველი საოპერო მომღერალი ასევე აანონსებს, რომ 2025/2026 წლის სეზონისთვის გენუის ოპერამ ის „მაკბეთის” მთავარ როლზე დაამტკიცა.
