ინტერნეტში გავრცელებული ჭორები, თითქოს ლეგენდარული მომღერალი და დრამერი ფილ კოლინზი ჰოსპისში იმყოფებოდა, მისმა წარმომადგენელმა უარყო. მისი თქმით 73 წლის არტისტი საავადმყოფოში მუხლის ოპერაციის გამოა.
ბოლო წლებში ფილ კოლინზს ხშირად ჰქონდა ჯანმრთელობის პრობლემები. Genesis-ის ყოფილი ფრონტმენი ყოველთვის ღიად საუბრობდა ჯანმრთელობის მდგომარეობაზე, რომელიც 2007 წელს მიღებული ზურგის მძიმე ტრავმის შედეგად გაუარესდა. შემდგომმა გართულებებმა ნერვის დაზიანება გამოიწვია, რამაც საბოლოოდ არტისტს ერთ ფეხში მგრძნობელობა დაუქვეითა.
2024 წლის დოკუმენტურ ფილმში Phil Collins: Drummer First, რომელიც 18 დეკემბერს Drumeo-ს YouTube არხზე გამოქვეყნდა, მუსიკოსმა გულწრფელად ისაუბრა ჯანმრთელობის მდგომარეობაზე, მის ცხოვრებასა და კარიერაზე.
„მთელი ცხოვრება დრამზე დაკვრას დავუთმე. ამ შესაძლებლობის დაკარგვა შოკისმომგვრელია. თუ იმას, რასაც ადრე ვაკეთებდი, ვეღარ გავაკეთებ ისეთივე ხარისხით, მირჩევნია, საერთოდ თავი დავანებო. თუ ერთ დღეს გავიღვიძებ და ისევ შევძლებ ხელში ჯოხების დაჭერას, რა თქმა უნდა, ვცდი, მაგრამ ვფიქრობ, ჩემი ძალები უკვე ამოვწურე.“ – ამბობს ფილმში მუსიკოსი.
კოლინზმა Genesis-თან გამოსვლა ოფიციალურად 2022 წელს გამართული გამოსამშვიდობებელი კონცერტის შემდეგ დაასრულა.
ის Genesis-ის წევრებთან, მაიკ რეზერფორდთან და ტონი ბანკსთან ერთად სცენაზე ბოლოს ლონდონში გამოვიდა. მაშინ კოლინზმა მსმენელს ხუმრობით მიმართა: „ამ საღამოს შემდეგ ყველამ ნორმალური სამუშაო უნდა ვიპოვოთ.“
კოლინზმა მუსიკალურ კარიერაში განსაკუთრებულ წარმატებას 1980-იან წლებში მიაღწია. როგორც სოლო არტისტი, ის შვიდი N1 ჰიტით მოხვდა Billboard Hot 100-ში, მათ შორის ჰიტ სიმღერებით: Against All Odds (Take a Look at Me Now), Sussudio, და Another Day in Paradise, ეს უკანასკნელი კი ოთხი კვირის განმავლობაში ლიდერობდა.
Billboard 200-ში პირველ ადგილზე გავიდა ფილ კოლინზის 1985 წლის ალბომი No Jacket Required, რომელმაც ბრილიანტის-სტატუსი და წლის ალბომის გრემი მიიღო. Genesis-თან ერთად კოლინზმა 1986 წელს N1 ადგილი მოიპოვა ჰიტ სიმღერით – Invisible Touch.
