ჯენიფერ ლოპესის კონცერტი სტამბოლში 5 აგვისტოს იყო დაგეგმილი, მანამდე კი, თურქული მედიის ცნობით, სუპერვარსკვლავი პრესტიჟულ სავაჭრო ცენტრს საშოპინგოდ ესტუმრა.
როგორც გამოცემა Patronlar Dünyasi იუწყება, მომღერალმა სავაჭრო ცენტრში „შანელის” მაღაზიაში შესვლა სცადა, თუმცა როგორც ჩანს, დაცვის თანამშრომელმა იგი ვერ იცნო და იმ მიზეზით, რომ მაღაზია ხალხით იყო სავსე, ჯენიფერ ლოპესი არ შეუშვეს. Billboard-მა ეს ფაქტი დაადასტურა. ინფორმაციის მიხედვით, რომელსაც თან ფოტოებიც ერთვის, ლოპესი ამ ფაქტს საკმაოდ მშვიდად შეხვდა და უპასუხა: „კარგი, პრობლემა არ არის.“
გავრცელებული ინფორმაციით, მოგვიანებით ჯენიფერ ლოპესს დაცვის თანამშრომლები მიუახლოვდნენ და “შანელის” ფილიალში მიიწვიეს, თუმცა, გამოცემის ცნობით, მომღერალმა შეთავაზებაზე უარი თქვა.
ეს არ არის პირველი შემთხვევა, როცა სუპერვარსკვლავი მსგავს სიტუაციას თავშეკავებული ხვდება. 25 ივლისს მას კონცერტზე კოსტიუმთან დაკავშირებით მცირე ინციდენტი შეემთხვა – ცეკვის დროს ქვედაბოლო გაეხსნა, ლოპესი კი ამ ყველაფერს იუმორით შეხვდა: „კარგია რომ საცვალი მეცვა, ხანდახან საცვლებს საერთოდ არ ვატარებ.” – თქვა ჯენიფერმა.
სუპერვარსკვლავი ამჟამად ტურნეში Up All Night: Live in 2025 იმყოფება. 8 ივლისს ტურნე ესპანეთის ქალაქ პონტევედრაში დაიწყო და შემდეგ მოჰყვა კონცერტები უნგრეთში, იტალიაში, თურქეთში, პოლონეთში, რუმინეთში, ეგვიპტეში, ყაზახეთში და სომხეთში. ტურნეს ფარგლებში 10 და 12 აგვისტოს ორი კონცერტია დაგეგმილი კვლავ ყაზახეთში და იტალიაში. ჯენიფერ ლოპესის კიდევ ერთი ახალი პროექტი მოლოდინით არის სავსე, ეს არის ფილმი, სახელწოდებით: Kiss of the Spider Woman – მუსიკალური ადაპტაცია, რომლის სცენარის ავტორიც და რეჟისორიც ბილ კონდონია. ფილმში ჯენიფერ ლოპესთან ერთად მონაწილეობენ დიეგო ლუნა და ტონატიუ ელიზარარაზი. ფილმის პრემიერა კინოთეატრებში 10 ოქტომბერს გაიმართება.
