დეიმონ ალბარნი, PinkPantheress და Jamie xx იმ არტისტებს შორის არიან, რომლებიც მონაწილეობას მიიღებენ ბრიტანელი მუსიკოსისა და კომპოზიტორის, ბრაიან ინოს მიერ ორგანიზებულ კონცერტში – Together for Palestine. ღონისძიება გაიმართება 17 სექტემბერს, ლონდონის OVO Arena Wembley-ზე და შემოსული თანხა მთლიანად გადაირიცხება საქველმოქმედო ფონდში – Choose Love, რომელიც პალესტინაში ჰუმანიტარულ დახმარებას აფინანსებს. ბილეთები უკვე ხელმისაწვდომია პლატფორმა My Ticket-ზე.
მუსიკალურ პროექტში ასევე მონაწილეობენ ჯგუფი Bastille, ქეთ ბერნსი, Greentea Peng, Hot Chip, ჯეიმს ბლეიკი, King Krule, Mabel, Obongjayar, პალომა ფეიტი, რეიჩელ ჩინურირი და Sampha, ასევე პალესტინელი არტისტები – ადნან ჯუბრანი, ფარაჯ სულეიმანი და ნაი ბარღუთი. ღონისძიებაში მონაწილეობას მიიღებენ PinkPantheress, რინა სავაიამა და რიზ აჰმედი. ეს სრული ჩამონათვალი არ არის და მომდევნო კვირებში სხვა შემსრულებლებიც გამოცხადდებიან.
ბრაიან ინო საღამოს აღმასრულებელი პროდიუსერი იქნება. პროექტის თანაორგანოზატორები ასევე არიან ფროდაქშენ-მენეჯერები – ხალედ ზიადა, ხალიდ აბდალა და ტრეისი სიუორდი.
„ღაზაში მიმდინარე საშინელებებზე სიჩუმე თანამონაწილეობაა. ხელოვანები ყოველთვის ეხმარებოდნენ საზოგადოებას უსამართლობის დანახვასა და უკეთესი მომავლის წარმოდგენაში. სწორედ ამიტომ არის მნიშვნელოვანი ეს კონცერტი. დრო იყო, გავერთიანებულიყავით – არა მხოლოდ ხმის ასამაღლებლად, არამედ ჩვენი ადამიანობის საჩვენებლად. მსოფლიოში, სადაც ხელისუფლებები და წამყვანი მედია გენოციდის ფონზე დუმს, ეს გაერთიანება წინააღმდეგობის ხმა ხდება. ხელოვანები და საზოგადოებები ერთად იკრიბებიან მწუხარებისა და რისხვის გამოსახატად და პალესტინის ხალხს, ისევე როგორც ყველა უსამართლობის მსხვერპლს, უცხადებენ მხარდაჭერას,” – განაცხადა ხალედ ზიადამ.
ბრაიან ინომ ღონისძიება 31 ივლისს დააანონსა. მან ინსტაგრამზე გამოქვეყნებული ვრცელი ტექსტით განმარტა, თუ რატომ დაიწყო პროექტი – Together for Palestine: „ღაზაში რასაც ვხედავთ, ეს არც საიდუმლოა და არც ურთიერთსაწინააღმდეგო ნარატივების ბურუსი, რომლის გაგებაც რთულია. როცა ათობით აპოლიტიკური ორგანიზაცია, როგორიცაა Amnesty International და Médecins Sans Frontières, ამას გენოციდს უწოდებს, მორალური ზღვარი ნათელია. დუმილი შეუძლებელია, ამიტომ ვიღებ მონაწილეობას ამ საღამოს ორგანიზებაში – ეს იქნება მუსიკის, დაფიქრებისა და იმედის ღამე Wembley Arena-ზე. მჯერა, რომ ეს საღამო შეიძლება გახდეს გამბედაობის ის მომენტი, როცა არტისტები ერთად გამოვლენ და სიმართლეს იტყვიან. ეს არის ის, რასაც ჩვენ მათგან ველით. სცენიდან, ან მსოფლიოს სხვა კუთხიდან ვიდეოს მეშვეობით, ეს არის შანსი, რომ ერთად ვიდგეთ და ვთქვათ: ეს აღარ უნდა გაგრძელდეს.“
ღაზაში სამხედრო ოპერაციები თითქმის ორი წელია გრძელდება. ღაზის ჯანდაცვის სამინისტრო იუწყება, რომ ამ დროის განმავლობაში 60 000-ზე მეტი პალესტინელი დაიღუპა. 2025 წლის ივლისის ბოლოს, ჯანდაცვის მსოფლიო ორგანიზაციამ გაავრცელა ინფორმაცია, რომ მოსახლეობაში და განსაკუთრებით ბავშვებში საკვების უკმარისობის გამო შიმშილის დონე საგანგაშოა.
ივლისში ბრაიან ინო მუსიკოსთა იმ ჯგუფს შეუერთდა, რომლებმაც შექმნეს გაერთიანება იმ არტისტების დასაცავად, ვინც ღაზაზე ისრაელის სამხედრო შეტევას აკრიტიკებს და შედეგად „აგრესიული, უსაფუძვლო კამპანიების“ მსხვერპლი ხდება პროისრაელური აქტივისტების მხრიდან. გაერთიანებაში ასევე არიან Fontaines D.C., Kneecap და Massive Attack. ინსტაგრამზე არტისტებმა განაცხადეს, რომ მათი მიზანია, დაიცვან ხელოვანები. გაერთიანება განსაკუთრებულ აქცენტს აკეთებს ახალბედა ხელოვანების მხარდაჭერაზე, რათა ისინი არ იქცნენ მუქარისა და „კარიერის დანგრევის“ საფრთხის მსხვერპლად ისეთი ორგანიზაციებისგან, როგორიცაა UK Lawyers for Israel (UKLFI).
