4 სექტემბერს კახეთში, წინანდლის ისტორიულ მამულში, ქვეყნისა და რეგიონის წამყვანი მუსიკალური ღონისძიება – წინანდლის კლასიკური მუსიკის ფესტივალი გაიხსნება. 2025 წელს ფესტივალი მე-7 სეზონით ბრუნდება. 4-დან 14 სექტემბრამდე წინანდალში ქართული და მსოფლიო მუსიკალური სცენის ვარსკვლავები მოიყრიან თავს და მსმენელს შთამბეჭდავ საღამოებს შესთავაზებენ.
ფესტივალის გახსნის დღეს, 4 სექტემბერს, კონცერტი 19:00 საათზე წინანდლის ამფითეატრში გაიმართება. მსმენელის წინაშე პიანისტი ბეხზოდ აბდურაიმოვი და პანკავკასიური ორკესტრი ჯანანდრეა ნოზედას დირიჟორობით წარდგებიან. კონცერტზე შესრულდება პიოტრ ჩაიკოვსკის საფორტეპიანო კონცერტი №1, სიბემოლ მინორი, თხზ. 23 და დმიტრი შოსტაკოვიჩის სიმფონია №5, რე მინორი, თხზ. 47.
ჯანანდრეა ნოზედა
წინანდლის ფესტივალის ფოტო არქივი
წინანდლის კლასიკური მუსიკის ფესტივალის მუსიკალური ხელმძღვანელი ჯანანდრეა ნოზედა ერთ-ერთი ყველაზე მოთხოვნადი დირიჟორია მსოფლიოში. ის ვაშინგტონის ეროვნული სიმფონიური ორკესტრისა და ციურიხის საოპერო თეატრის მუსიკალური დირექტორია. მისი ხელმძღვანელობით ვაშინგტონის ეროვნულმა სიმფონიურმა ორკესტრმა ახალი შემოქმედებითი ენერგია და საერთაშორისო აღიარება მოიპოვა, რასაც მოჰყვა კონცერტები კარნეგი-ჰოლსა და მსოფლიოს სხვა წამყვან სცენებზე.
ნოზედას კარიერა მოიცავს 80-ზე მეტ ჩანაწერს და თანამშრომლობას მსოფლიოს წამყვან ორკესტრებთან. ის მრავალი საერთაშორისო ჯილდოს მფლობელია. 2023 წელს, კლასიკური მუსიკის ერთ-ერთ ყველაზე მნიშვნელოვან საერთაშორისო დაჯილდოება OPER! AWARDS-ზე ჯანანდრეა ნოზედამ „წლის საუკეთესო დირიჟორის“ ჯილდო მოიპოვა.
ბეხზოდ აბდურაიმოვი
წინანდლის ფესტივალი IG
35 წლის უზბეკი ბეხზოდ აბდურაიმოვი საერთაშორისოდ აღიარებული პიანისტია, რომელსაც კლასიკური მუსიკის სცენაზე ტექნიკა და მუსიკალური სიღრმე გამოარჩევს. ის თანამშრომლობს მსოფლიოს წამყვან ორკესტრებთან, მათ შორის ნიუ-იორკის ფილარმონიასთან, ვენისა და ჩიკაგოს სიმფონიურ ორკესტრებთან, ხოლო მისი ჩანაწერები არაერთი პრესტიჟული ჯილდოს მფლობელია. 2026 წლის მაისში აბდურაიმოვი კარნეგი-ჰოლში მეოთხედ გამართავს სოლო კონცერტს.
პანკავკასიური ახალგაზრდული ორკესტრი
წინანდლის ფესტივალის არქივი
პანკავკასიური ახალგაზრდული ორკესტრი 2019 წელს „წინანდლის კლასიკური მუსიკის საერთაშორისო ფესტივალის“ ფარგლებში დაარსდა და კავკასიის რეგიონში მცხოვრები ახალგაზრდა ხელოვანებით დაკომპლექტდა. ყოველწლიურად ორკესტრისთვის ნიჭიერი მუსიკოსების აღმოსაჩენად ცოცხალი შესარჩევი მოსმენები ტარდება, სადაც მონაწილეობის მიღება 18-იდან 28 წლამდე ახალგაზრდებს შეუძლიათ. წელს მოსმენები ცხრა ქვეყანაში გაიმართა: საქართველოში, სომხეთში, აზერბაიჯანში, თურქეთში, უკრაინაში, მოლდოვაში, ყაზახეთში, უზბეკეთსა და თურქმენეთში. შერჩეული მუსიკოსები ფესტივალის დაწყებამდე ორი კვირის განმავლობაში რეპეტიციებს მსოფლიოს წამყვანი ორკესტრების პედაგოგებთან გადიან.
წინანდლის ფესტივალი წელსაც, ტრადიციისამებრ, მსოფლიოს მუსიკალური მედიის ფოკუსში იქნება. ღონისძიება არაერთ ქვეყანაში გაშუქდება.
ფესტივალის სრული პროგრამის სანახავად ეწვიეთ ბმულს.
